Atzaparretan erori gabe

Zaila bada, ez da ezinezkoa. Hori pentsatu nahi dute realzale guztiek. Izan ere, Erroman 2-0 galdu eta gero, talde txuri-urdinak zail dauka Europa ligako final-zortzirenetako kanporaketa gainditzea. Gutxienez bi golen aldearekin irabazi beharko du luzapena behartzeko, eta hiru golen errenta behar du kanporaketa zuzenean gainditzeko. Ez da ezinezkoa, baina, aurrean daukan taldearen jokatzeko modua eta denboraldi honetan dituen zenbakiak ikusita, Jose Mourinhoren taldeak kanporaketa nahiko bideratuta daukala esan daiteke. Final-laurdenetarako sailkatzeko, Realak ezin du otsemearen atzaparretan erori. Horretarako, funtsezkoa izango da zaintza lana hobetzea eta erasoko jokaldiei etekin handia ateratzea.

«Argi dago kanporaketa gainditzea oso zaila izango dela, baina badaukat esperantza. Ikusi nahi dut Realak nola erantzuten duen horrelako egoera batean. Erromak diziplina handia du; aurkari deserosoa da. Baina partidak jokatu egin behar dira. Bi areetan eraginkortasun handiagoa izan beharko du Realak». Salva Iriarte Realeko jokalari eta entrenatzaile ohiaren hitzak dira. Badu esperientzia halako egoeretan; izan ere, 1979-1980ko denboraldian, UEFA txapelketan, Realak estu hartu zuen Inter Milan. «3-0 galdu genuen Italian, baina kanporaketa gainditzeko aukera izan genuen, Atotxan 2-0 irabazita. Gehien gogoratzen ditudan partidetako bat da. Jokatzeko eta borrokatzeko modua ikusgarria izan zen. Kanporaketa irabazia zutela uste zuten, baina gogotik sufritu behar izan zuten aurrera egiteko. Bihar halako zerbait gerta liteke».

Joaneko partidaren atarian aipatu bezala, Erromaren bertute nagusiak kontraerasoan ateratzeko gaitasuna eta defentsako lana dira. Ez du joko zirraragarria egiten, baina aurkariaren hutsak aprobetxatzen oso multzo trebea da. Hiru gauza horiek eginda menderatu zuen Reala Erromako Olinpiar Estadioan, eta bihar, Reale Arenan, ideia berarekin zelairatuko da. «Garrantzitsuak diren detaile txikiek erabaki zuten joaneko partida, eta bihar antzeko neurketa espero dut, edo zertxobait itxiagoa. Joanekoan, Erromak ez zuen batere arriskatu, eta bihar ere hala izango da. Reala erakarri nahiko du, eta baloi bat berreskuratzen duenean, azkar eta zuzen jokatu. Egiten duenari errentagarritasun handia ateratzen dio Erromak».

Jokatzeko era «aproposa»

Realaren jokatzeko era Erromarentzat «aproposa» dela uste du Iriartek. «Baloia etengabe alde batetik bestera mugitzen duen talde bat baita. Bitartean, eurak atzean itxita lasai daude, baloia noiz berreskuratuko zain; 70 metroko lasterraldiak egiteko jokalari aproposak dituzte».

Beraz, Erromak antzeko partida joka dezake Donostian. Eta Realak? «Ideia ez da asko aldatuko. Hori bai, huts gutxiago egitea funtsezkoa izango da: erasoan ari denean, atzealdea ondo zaindua izan beharko du, eta, horrekin batera, azken metroetan eraginkorragoa izatea funtsezkoa da. Gol bat azkar sartzen badu, Erroma urduri jar daiteke, nahiz eta ahulgune gutxi dituen».

Kanporaketa gainditzeko, bere bertsiorik onena eman beharko du Realak. Atzean sendo eta aurrean oso eraginkor aritu beharko du, zenbakiek erakusten duten moduan, Mourinhoren taldeari golak sartzea zaila baita. Denboraldi honetan, Udinesek eta Sassuolok baino ez dizkiote bi gol baino gehiago sartu partida batean.

Hain justu, azken talde horren aurka 3- 4 galdu zuen Italiako hiriburuko taldeak asteburuan, ligan. Edonola ere, badaude esperantza sortzen duten bestelako zenbakiak. Esaterako, Munduko Txapelketaren ostean, etxetik kanpo jokatu dituen sei neurketetatik hiru galdu ditu. Badute zeri heldu realzaleek.