Albistea entzun

'Sagastitarrak' lanarekin abizenaren eztabaida oholtzaratuko du Txalok

Gaur estreinatuko du Txalo konpainiak 'Sagastitarrak'. Joseba Apaolaza, Koldo Olabarri eta Ainhoa Etxebarria dira antzezleak. Anton, aita, ez dator bat alabak hartu duen azken erabakiarekin

Ezkerretik hasita, Koldo Olabarri, Joseba Apaolaza eta Ainhoa Etxebarria aktoreak.
Ezkerretik hasita, Koldo Olabarri, Joseba Apaolaza eta Ainhoa Etxebarria aktoreak. TXALO PRODUKZIOAK Tamaina handiagoan ikusi

Leire Perlines Apalategi -

2022ko abuztuak 18

Asko dira oraindik ere haur bat izan eta zein abizen jarri erabakitzeko garaian talkak eta eztabaidak izaten dituztenak. Batzuetan abizena galtzearen beldurragatik izan daiteke; baina ba ote du tradizioak, ospeak edo gizarte mailak zer ikusirik afera horretan? Horixe da, hain zuzen ere, Txalo konpainiak gaur Donostian estreinatuko duen antzezlan berriaren ardatza: Sagastitarrak. Gaur, bihar eta etzi izango da antzezlana Donostiako Antzoki Zaharrean; hiru egunetan 20:00etan. Sarreren prezioa 20 - 25 euro artekoa da.

 

Goi burgesiako familia bat dira sagastitarrak, eta ez da giro haienean, Ane alabak hartu duen erabaki berriarekin. Ekintzaile feminista da hura, eta umetatik jarri zioten abizenen hurrenkera auzitan jartzen hasi da. Ohikoena denez, aitarena darama aurrena eta amarena bigarrena, eta hori aldatu nahi du orain. «Patriarkatua ez dugu amaituko mundura ekarri gaituen amaren abizena hartzen ez dugun bitartean», adieraziko du.

Anton Sagasti da familiako aita, gainontzekoak baino tradizionalagoa eta kontserbadoreagoa, eta ez du ulertzen alabak haren abizenen ordena aldatu nahia. Ane eta bere bikotekidea, berriz, ideologikoki aitarengandik urrunago daude.

Koldo Olabarrik, Ainhoa Etxebarriak eta Joseba Apaolazak osatu dute antzezlaneko aktore taldea, eta Begoña Bilbao konpainiako kidea arduratu da zuzendaritzaz. Lanaren egilea, ordea, Ramon Madaula da, jatorrizko obra katalanez baita: Els Brugarol.

Bilbaok hasieratik argi zuen Apaolaza izango zela aktoreetako bat, uste baitu genero horretan «oso ondo» moldatzen dela. Etxebarria eta Olabarri, berriz, «aurkikuntza» bat izan dira zuzendariarentzat. Etxebarria irratian eta telebistan aritua da, eta Olabarri, esaterako, Goenkale telesailean.

Madaulak etxean gertatutako egoera baten ondorioz erabaki zuen obra hau sortzea: alabak, behin, amaren abizena lehenengo jartzea zer iruditzen zitzaion galdetu zion, eta, berak «modernoa» zela uste bazuen ere, bere barnean zalantza moduko zerbait sortu zela kontatzen du.

Bilbaok esan duenaren arabera, trama katalanez eta euskaraz berbera da, baina, hasierako familiaren kokapena Katalunia zenez, nolabait Euskal Herriratu egin dute: «Enpresa aldatu dugu, esaterako, bertan ohikoagoa den eremu batera hurbiltzeko, eta berdin izen-deiturekin eta zuhaitz genealogikoarekin».

Politikak ere badu bere pisua: «Izenik eta alderdirik zehaztu gabe, baina bi alderdi ideologiko daude antzezlanean. Oro har, mundua ulertzeko bi era ezberdinek talka egiten dute: aita kontserbadorea da, tradizionalagoa, eta alaba eta suhia, berriz, ideologikoki ezkertiarragoak dira, antisistemagoak eta alternatiboagoak», zehaztu du Bilbaok.

Komedia da antzezlanaren generoa; beraz, barre egitea du helburuetako bat, baina zuzendariak adierazi du hausnartzeko bidea ere ematen duela: «Obrak, barre eragiteaz gain, zer pentsatua ere ematen du; komedia da, baina badu bere konplexutasuna».

Bilbora urrian

Gaurko estreinaldiaren aurretik, Urnietan (Gipuzkoa) egin zuten Sagastitarrak lanaren aurrestreinaldia, herenegun, eta «sentsazio oso onekin» agurtu zuten oholtza, zuzendariak kontatu duenez. Pozik azaldu da jende asko bildu zelako, eta publikoaren zati handi bat antzezlanaren hasieratik sartu izanak aho zapore ona utzi dio estreinaldiaren aurretik.

Ondoren, irailaren 23an Galdakaon (Bizkaia) erakutsiko dute lana, eta Bilbora helduko da gero antzezlana; urriaren 2an izango da azken hori, Arriagan. Jarraian, Pasaian (Gipuzkoa) izango dira, urriaren 15ean hain zuzen. Euskarazkoaz gain, gaztelaniazko bertsioa ere lantzen hasiak direla aurreratu dute: azaroaren 13an estreinatuko dute, Ribaforadan (Nafarroa), eta Leioan (Bizkaia) ere izango dira 18an. 

 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Joanes Illarregi, bigarren final-laurdeneko irabazlea, gaur Arrasatek saioan. ©Andoni Canellada/FOKU

Joanes Illarregik irabazi du Arrasateko saioa

Miren Mujika Telleria

678 puntu bilduta lortu du lehen postua. Saioa Alkaiza izan du atzetik, bost punturen aldearekin.

Laura Mora, <em>Los reyes del mundo</em> filmeko zuzendaria (eskuinean), filmeko lantaldeko kideekin, atzo, Kursaaleko amaiera galan. ©ANDONI CANELLADA / FOKU

'Los reyes del mundo'-k irabazi du Urrezko Maskorra

Ainhoa Sarasola - Mikel Lizarralde

Laura Mora zuzendari kolonbiarrak bere herrialdeko bost gazteren istorioarekin eskuratu du jaialdiko sari nagusia. Genki Kawamura japoniarrarentzat izan da Zuzendari onenaren Zilarrezko Maskorra

Neil Jordan zinemagilea, Diane Kruger eta Liam Neeson aktoreekin, <em>Marlowe</em> filma aurkezteko agerraldian, atzo, Donostiako Zinemaldian. ©ANDONI CANELLADA / FOKU

Neil Jordanen 'Marlowe' filmaren lehiaz kanpoko emanaldiak itxi du Zinemaldia

Ainhoa Sarasola

Neil Jordanen 'Marlowe' filmaren lehiaz kanpoko emanaldiak itxi du Zinemaldia. Liam Neesonek egin du Philiph Marlowe detektibearena, eta Diane Krugerrek Clare Cavendish haren bezeroarena

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.