Donostiako Jazzaldiaren antolatzaileek 54. aldiaren balorazioa egin dute, hura amaitzearekin batera. Musikariak izan dituzte gogoan, baina aipamen berezia egin diete entzuleen «fideltasunari eta jarrera onari». Eskertu egin diete kontzertuetara joan izana jaialdiak eguraldia lagun izan ez duenean ere. Denera, 168.000 entzule izan ditu 54. Jazzaldiak, ia iazkoak adina, eguraldia okerragoa izan den arren.
Miguel Martin Jazzaldiaren zuzendariak zenbait emanaldi nabarmendu zituen atzoko prentsaurrekoan: Maria Schneiderrek Ensemble Denada taldearekin Trinitate plazan eman zuen kontzertua «jaialdiaren historiako gogoangarrienetako bat» izan zen harentzat. Bestalde, aipatu zituen Atomicek Kursaal auditoriumean Trondheim Jazz Orchestrarekin egin zuen emanaldi «txundigarria», eta John Zornek Viktoria Eugenia antzokian egin zituen maratoi bakanak.
Gero eta emakume gehiago euskal musika taldeetan «lehen lerroan kementsu» ikusi izanak ere poztu ditu antolatzaileak: jazz taldeetan (Reunion Big Band, Lurpekariak), rock taldeetan (Belako, Nogen) zein bakarka (Ainhoa Larrañaga, Sara Zozaia).
Dagoeneko datorren urteko jaialdiari begira jarri dira antolatzaileak: 55. Jazzaldia uztailaren 22tik 26ra bitarte izango da.
Donostiako 54. Jazzaldia
54. Jazzaldiak 168.000 entzuleren «harrera beroa» eskertu du
Antolatzaileek Maria Schneiderren, Atomicen eta John Zornen emanaldiak nabarmendu dituzte. «Pozik» daude gero eta emakume gehiago ikusten dituztelako euskal taldeetan
Iruzkinak
Ez dago iruzkinik
Ordenatu
