Albistea entzun

Bestarako berotzen hasiak

Sanferminak ate joka direla, Iruñeko peñek beren eguna ospatuko dute gaur. Bi aste barru aurkeztuko dituzte pankartak. Hausnarketa prozesuan murgildurik daude.
Bi lagun peña baten pankarta biltzen, 2019ko ekain hondarrean ospatutako Peñen Egunean.
Bi lagun peña baten pankarta biltzen, 2019ko ekain hondarrean ospatutako Peñen Egunean. JAGOBA MANTEROLA / FOKU Tamaina handiagoan ikusi

Iker Tubia -

2022ko ekainak 18 - Iruñea

Beroketa ariketekin hasiak dira Iruñean. Estafeta karrikako erlojuak argi dio: hemezortzi egun falta dira sanferminak ospatzeko. Iruñeko peñak ere horretan dabiltza, beroketa ariketekin, eta prestaketa lanak garaiz burutu nahian. Gaur «motorrak berotzeko» eguna dute, peña guzietako kideak batu eta elkarrekin atzerako kontua samurrago egiteko besta eginen baitute. Iruñeko Peñen Eguna da, ohi baino lehenago, eta zezen plazan eta haren inguruetan pasatuko dute eguna Iruñeko Peñen Federazioko hamasei peñetako kideek.

Bi urte igaro dira ofizialki sanferminik ospatu gabe, eta gogotsu daude peñetako kideak. Aperitifa da gaurkoa: «Egun berezia da peñetako kide askorentzat, peña guzietako kideak elkartzen baikara. Bazkarian 650 lagun egonen gara. Urte osoan elkar ikusten ez dutenen elkargunea ere bada», esan du Iosu Santxez Iruñeko Peñen Federazioko lehendakariak. Lehenbiziko ekitaldia bigantxak izanen dira, zezen plazan. Sartzeko, kilo bat janari eramateko eskatu dute, Zaporeak elkarteak errefuxiatuekin egiten duen lana babesteko. Gainerako ekitaldiak plazaren inguruetan izanen dira.

Sanferminak ate joka direla iragarri ohi du peñen egunak. Aurten ohi baino lehenago egin dute, Mecak ikuskizun bat prestatu duelako ekaineko hondarreko asteburuan. Zezen plazak ehun urte bete ditu aurten, eta ospakizunetako ekitaldi nagusia hori izanen da. Beraz, aurtengo pankartak ez dituzte aurkeztuko. Hori bi aste barru izanen da: ekainaren 30ean kaleratuko dituzte marrazkien afixa txikiak, eta uztailaren 2an karrikara aterako dituzte oihalak.

Dena prest dutela azaldu du Santxezek, nahiz eta oraindik zereginik ez den faltako uztailaren 6ra bitarte. «Uste genuen azken bi urteetan herdoiltzen hasiak ginela, baina ohartu gara ezetz; martxa ederra hartu dugu azken hilabeteotan, eta primeran joan da prestaketa lana». Urduri daude, gogotsu, baina ez beste urte batzuetan baino gehiago ere. «Sanferminetarako gogoa ez da aldatu bi urte hauetan; gizartea ere ez da aldatu. Lehen adinako gogoa dugu: lan egiteko, karrikara ateratzeko, gozatzeko eta gozarazteko gogo bera dugu sanferminak ongi joan daitezen», zehaztu du.

Barne eztabaida

Urte berezia da aurtengoa, aurreko bietan ez baita sanferminik izan. Ez horregatik bakarrik. Peñen federazioak barne hausnarketa bat abiatu zuen pandemia betean, eta prozesu horretan erabat murgildurik daude. Lehenbiziko fasea eginda, orain bigarrenari ekin diote, eta irailean eta urrian izanen dira saio nagusiak.

«Federazioa sortu zenez geroztik, inoiz ez da halako hausnarketarik egin. Beti jo dugu aurrera, aurreko batzordearen lanari jarraikiz. Baina gizarteak aurrera egin du, dena doa aurrera, eta gu duela 30 urte gelditu ginen. Gizartearekin batera egin nahi dugu aurrera», azaldu du federazioko lehendakariak. Pandemiaren geldialdiak lagundu du prozesua patxadaz egiten.

Lehenbiziko fasean, nondik heldu diren eta nola dauden aztertu dute. 1.170 bazkidek parte hartu dute prozesu horretan, peñen bazkideen %20 inguruk. Datu batzuk ere eman dituzte: hamasei peñetan 5.173 bazkide daude, eta gizonen eta emakumeen arteko arrakala nabarmena da. Bazkideen %80 gizonak dira, eta %20 emakumeak. Zalantzarik gabe, heldu beharreko gaietako bat izanen da berdintasunarena. Ez hori bakarrik. Lehenbiziko fasean parte hartu duten bazkideen laurdenek uste dute zezenketen gaia eztabaidatu beharko luketela. Gaur ongi pasatzeko bilduko dira, baina, seguruenik, gai horiek ere aterako dira mahai gainera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JAGOBA MANTEROLA / FOKU

«Donostian inauteriak San Sebastian egunean hasten ziren»

Amaia Jimenez Larrea

XIX. mendean Donostiako inauteriak nolakoak ziren azaltzen duen liburu bat atera du Juan Antonio Anterok. 16 urte zituenean izan zuen lehen harremana inauteriekin, eta geroztik ez ditu alde batera utzi.
1 ©GOTZON ARANBURU / FOKU

Udaberriak ekarri duen soinua

Itsaso Jauregi

Inauterietako eguna ospatu dute Iturenen, eta joaldunek eta mozorroek hartu dituzte herriko kaleak. Tradizioari jarraituz, zubietarren eta aurtiztarren joareak elkartu ziren atzo; gaur, iturendarrek bisita itzuliko diete.
Mikel Pagadizabalek Miren Nogalesekin batera aurkeztuko du <em>Herri txiki, infernu handi</em>-ren denboraldi berria. ©ORIO P.

Miren Nogales izango da 'Herri txiki'-ko aurkezle berria

Urtzi Urkizu

ETB1eko saioak igandean hasiko du bederatzigarren denboraldia. Nogalesek beteko du Zuhaitz Gurrutxagak utzitako tokia

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.