Gaurkoa azoka eguna izango da, egun oso bat, baina egun bakar bat. Gazteak, ordea, ikasturte guztian aritu dira gaur erakutsiko dituzten proiektuak garatzen. Horretarako, unibertsitateko 150 ikertzailerekin baino gehiagorekin aritu dira lanean. «Ikertzaileak ikasleen eskura jartzen dira; euren jarduna zein den ezagutzeko, eta euren eskutik aholku lana izateko», Lasak azaldu duenez.
33 ikastetxetako 250 talde baino gehiago aritu dira ikasturte honetan proiektuak garatzen; orotara, ia mila gazte. Gaurko azokara ez dira denak joango; orotara, 90 talde inguruk erakutsiko dituzte egindako lanak. «Azokaren eguna festa handi bat da, non gazteek urte osoan egindako zientzia-teknologia lan guztiak erakutsiko dituzten kalean. Gazteek kultura zientifikoa dakarte kalera, eta Elhuyarren aldetik, euskara sustatuta, gainera».
«Erdibideko mugarria»
Azokako eguna «erdibideko mugarri bat» izango da, Lasaren esanetan; beste azoka eta egitasmoetara iritsi aurreko mugarria.
Horretarako, ebaluatze talde batek lan batzuk nabarmenduko ditu, eta aipamena jasotzen dutenek hiru motatako sariak eskuratu ahalko dituzte. Lasak azpimarratu duenez, sariak berriz «zientzia bizipenak» izango dira: «Batetik, eta indartsuena, bidaiak eta beste azoketan parte hartzeko aukera; bigarrenik, egonaldiak inguruko ikerketa zentroetan eta zentro teknologikoetan, udan bi egun eurekin ikertzeko aukera eskaintzen dute; eta hirugarren sari mota ikastaroak izango dira, Bizkaia Talentekin edo UEUn, adibidez».
Hain zuzen, modu horretan Euskal Herriko zientzia eta teknologien «sare osoa» inplikatzea ere bilatzen du egitasmoak. «Ikertzaileek proiektuetan hartu dute parte, eta ikerketa zentroek gero hartuko dute parte, gazteak euren etxean hartuta». Ikuspegi bati erantzuten dio planteamendu horrek: ikerketa arduratsuaren fokuari. «Horrek jasotzen du ikerketa sistemak inplikatu behar duela gazteen zientzia hezkuntzan, genero berdintasunaren alde egin, irekitasuna sustatu... Azkenean, leloa hori da: bizipenak eta komunitatea».
