Arrantzaleak berdel kanpainan sartuta daude jadanik, eta,nahiz eta urtero kuota txikiagoak izan, itsasoari loturiko sektorearentzat garrantzi handia du kanpaina horrek. Horregatik, Mutrikun, arrainaren ezaugarri gastronomikoak eta osasungarriak ezagutarazteko, jaia antolatu dute gaurko.
Ez dute nolanahiko festa antolatu, gainera; zenbakiei erreparatuz gero, behintzat. Guztira, 1.800 kilo berdel erosiko dituzte, ondoren sukaldariei eta boluntarioei banatzeko. Berdelarekin egindako 10.000 pintxo prestatuko dituzte, 7.000 berdel erre anoa eta 1.500 berdel marmitako anoa. Azken horiek herriko elkarteek prestatuko dituzte.
Goizean goizetik hasiko da jaia. 09:00etan azoka txikia egingo dute plazan; 14:00etara arte egongo dira zabalik postuak, eta denetarik salduko dute. 10:00etan, berriz, XI. Belaontzien Txapelketa egingo dute, Kalatxori elkarteak antolatuta.
Eguerdian poteoaren txanda izango da. 12:00etan hasita, berdel pintxo-potea egingo dute herriko tabernetan. Ordu berean, gainera, trikitilariak ibiliko dira herriko kaleetan barrena.
Gastronomia nagusi izango den arren, musikarik ere ez da faltako gaur. Izan ere, gastronomia eta kultura nahasten ditu gaurko jaiak. Herriko abesbatzak bilduko dira 13:00etan Zabiel plazan, eta kontzertua emango dute.
Pintxoak eta musika
Goizeko ekitaldiak bukatuta, arratsaldean jarraituko du festak. 18:00etatik aurrera portu inguruan batzen hasiko dira herritarrak, itsasertza jendez bete arte. Izan ere, postuak jarriko dituzte portuan, berdela era askotara dastatu ahal izateko: parrillan eginda, marmitakoan, kroketa erara... Trago bat eskuan eta ahoa beteta ibili ohi dira gehienak.
Portuko berdel dastatzea izan ohi da eguneko ekitaldi nagusia. Baina ez azkena. Giroa musikaz alaitzeko, 19:30ean The Uski´s musika taldeak kontzertua emango du portuan bertan.
22:00etan, II. Berdel Saria banatuko dute, eta, ordu berean, zesta puntako finalak jokatuko dituzte, Miruaitz pilotalekuan. Mutrikuko Danok Bateko pilotariek Markina-Xemeingo taldearen aurka jokatuko dute. Gazte eta nagusi mailako partidak jokatuko dira.
Berdel Eguna gaur duten arren, aurretik murgilduta ziren herritarrak ospakizun giroan. Joan den martxoaren 23an, berdel aipamena eman zioten Iñigo Lezertuari. Eskamak kentzen telesaileko gidoilaria da mutrikuarra, eta saioak herrian egindako ekarpenagatik saritu dute.
