Boilur biltzaileak isilpean aritzen ziren garai batean, gainerakoei aurkitu zutena non eta nola jasotzen zuten ia azaldu gabe. Antolatzaileek uste dute gaur egun hori aldatu dela, eta zoriak inguruari eman dion produktua guztien eskura egon behar duela. Helburu horrekin egin zuten lehen azoka orain dela hamabost urte, eta hala jarraitzen dute oraindik ere. Neguko boilurra izango da azokaren protagonista. Udakoarengandik bereizten da, besteak beste, kolore ilunagoa duelako. Azaroaren bueltan hasten da jasotzeko garaia, eta martxora aldera arte irauten du. Askotan, txakurrek bildu ohi dituzte boilurrak.
Hitzaldi batekin abiatuko dute gaurko egitaraua. Boilurraren ekoizpenak merkatuan duen egitekoa eta etorkizunean joka dezakeena izango ditu hizketagai Marcos Morcillok. Micologia Forestal &Aplicada enpresako zuzendaria da bera. Era askotako perretxikoen, tartean boilurren, ekoizpenerako tresnerian espezializatuta dago enpresa.
Hor amaituko dira goizeko ekitaldiak, eta 18:30 arte iraungo du etenaldia. Orduan, ardoarekin batera dastatu ahal izango dute boilurra Orisoainera biltzen direnek. Jose Manuel Perez de Ciriza enologoak izango du bi produktuak elkartzeko ardura. Perez de Ciriza ezaguna da herrian,enologoa izateaz gain, Palacio de Orisoain landetxeko jabea baita, eta ondo ezagutzen ditu boilurraren sekretuak.
Egun handiena, ordea, biharkoa izango da. Eguerdiraarteko egitaraua atondu dute antolatzaileek. Boilurra plater guztietan osagai izango duen herri bazkari batekin amaituko da azoka.
Horren aurretik, 11:00etan, azokaren inaugurazio ofiziala egingo dute, eta, momentu horretatik aurrera, herriko plazan izango dira boilur freskoak nahiz onddoa osagai duten era bateko eta besteko produktuak. Jendeak horiek ikusi, erosi eta dastatzeko aukera izango dute.
Jarraian, erakustaldiak egingo dituzte, boilurra nola topatu erakutsiz. Alde batetik, 11:30ean, zenbait boluntario ariko dira lan horretan, herriko frontoian. Bestetik, 12:00etan, herriaren inguruko lursail batean ariko dira eginkizun berberean, baina, kasu horretan, txakurrak eta basurdeak erabiliko dituzte.
13:00etan, show cooking erakustaldi bat egingo dute El Mercao jatetxeko sukaldariek. 14:30ean emango zaio amaiera azokari, boilurra osagai duten produktuekin osatutako otarre baten zozketarekin. Gainera, gaita jotzaileak eta erraldoiak ariko dira kalean giroa jartzen egun osoan.
