Amaigabea izan daiteke hamaika arrazoirengatik ezagutzea merezi duten txokoen zerrenda, etxetik bertatik hasi eta munduaren hedapen guztian. Sevatur azokaren hamaseigarren aldiak zerrenda 110 helmugara mugatu du, Euskal Herriko gertuko lekuak eta urruneko herrialdeak plaza berera ekarrita. Ideia berriak, proposamen ezohikoak, helmuga exotikoak... denetarik jarriko du azokak bidaia zalearen eskura.
50 mahai jarriko dituzte, eta horien artean Senegal izango da aurtengo berrikuntza; lehenengo aldia da herrialde horrek Sevaturren parte hartzen duena, eta ur jauziak, erliebe laua, askotariko paisaiak eta 700 kilometrotik gorako kostaldeko hondartzak erakutsiko ditu Sahel Evasions bidaia agentziak.
Europako helmugak nagusi
Afrikako herrialde bakarra Senegal izango den moduan, Ozeano Atlantikoaren bestaldeko bakarra Dominikar Errepublika izango da; eta klima epela, natura guneak eta kultura aberatsa erakutsiko ditu Sevaturren. Gainontzean, Europako herrialdeak nagusituko dira: Italia, Polonia, Espainia, Portugal, Frantzia, Herrialde Katalanak eta Galizia.
Nafarroak erakusmahai propioa izango du, eta lurraldea zeharkatzen duten bideak, eremu berdeak eta kultur ondarea aurkeztuko dizkie bisitariei. Araba, Bizkaia eta Gipuzkoa erakusmahai bakarrean egongo dira, Ezin gehiago sartu hain leku gutxian leloarekin. Tokian tokiko gastronomiara hurbiltzeko zenbait jaki ere eskainiko dituzte erakusleek.
18.000 lagunetik gora bildu izan ditu Sevaturrek azken urteetan, eta azoka «errentagarria» bihurtu da enpresa erakusleen gehiengoarentzat, antolatzaileen arabera. Aurtengo berrikuntzen artean, gogoetarako eta eztabaidarako espazio berri bat ireki du azokak, eta Beste turismo bat posible da izeneko jardunaldia egin zuten atzo. Sektoreko hainbat profesionalek turismoaren fenomeno globalak lortu duen dimentsioa eta haren ondorioak izan zituzten hizpide.
Azokara doazenek ondorengo bidaien zozketan hartuko dute parte hurrengo oporraldirako: Mediterraneotik itsas bidaia, Dublinera bidaia, Balearretara (Herrialde Katalanak), Norvegiako fiordoetara, Poloniara, Gijonera (Espainia) eta Senegalera.
