Euskaraz Bizi eguna egingo den zazpigarren aldia da gaurkoa, eta Izan, Egin, Eragin. Euskal Herrian Euskaraz leloa aukeratu dute aurtengo aldarri gisa. Antolatzaileen arabera, «jauzi kualitatiboa» emateko garaia da: «Gure etorkizunerako erabakigarriak diren garaiak dira hauek, eta bakoitzak beretik eta komunitate moduan bultza eginez euskaldunok asmatzera behartuta gaude». Zeregin horretan jarri nahi du indarra EHEk, eta, horretarako, «norbanakoen ahalduntzea» izango dute ardatz.
EHEk, herri eragileen arteko auzolanaren bitartez, jaia eta aldarrikapena uztartuko dituen egitarau zabala osatu du. Haur eta helduentzako jarduerak prestatu dituzte; guztiak Xaho kaian egingo dituzte.
10:00etan izango dira eguneko lehen ekitaldiak. Eskulangileen eta eragileen erakustazoka egingo dute, eta, aldi berean, umeentzako jokoak eta puzgarriak izango dira. Haiekin batera, Behatokiak eta Kontseiluak #Akuilari tailerra gidatuko dute, eta, horrez gain, joaldunak ibiliko dira kalean barrena.
Jarduera horien ostean, haurrek gehien itxarondako unea iritsiko da. 11:00etan, Porrotx pailazoa Baionan izango da, eta ikuskizun bat emango du. 13:30ean,goizeko ekitaldiei amaiera emateko, herri bazkaria egingo dute, eta, jarraian, kantaldia izango da, Erramun Martikorenaren eskutik.
Arratsaldean, berriz, aldarrien txanda izango da. 17:30ean, kalejira bat egingo dute Baionako kaleetan barrena, Izan, Egin, Eragin. Euskal Herrian euskaraz lelo dutela. Horren ostean, Xumai Murua eta Ortzi Idoate bertsolariek gidatuta, bertso poteoa izango da herriko tabernetan. Bertsolariez gain, elektrotxaranga bat ibiliko da tabernaz taberna giroa alaitzen.
Gauean, festan jarraitzeko aukera izango dute hala nahi dutenek, hiru kontzertu izango baitira, 21:00etan hasita: Baionako Torii taldearena, Sorkunena, eta Jo ta Txo! DJak emango duena.
