Noiz sortua: 2018-07-14 00:30:00

Inoiz ez da beranduegi arraunerako

Orioko 32 emakume 198 kilometroko erronka bat ari dira egiten: Oriotik Bilbora joan eta etorri arraunean. Bihar amaituko dute saioa
Orioko arraunlariak, atzo, Bilboko udaletxe parera iritsi zirenean.
Orioko arraunlariak, atzo, Bilboko udaletxe parera iritsi zirenean. MONIKA DEL VALLE / FOKU Tamaina handiagoan ikusi

Uxue Gutierrez Lorenzo -

2018ko uztailak 14
Erotzat jo zituzten herrian Oriotik (Gipuzkoa) Bilbora arraunean joango zirela esan zutenean. «Zergatik ez?», pentsatu zuten eurek. Esan eta egin. Bidearen erdia eginda, lortu zuten urrian ezarritako erronka betetzea: 32 arraunlari hasiberri heldu ziren atzo eguerdian Bilbora. Zerua oskarbi, itsasbehera eta animo oihuak, harrera beroa egin zioten Tknika traineruari. Arraunak gora, eguzkia goi-goian eta Bilboko itsasadarra. Udaletxe aurrean trainerua lotu zuten arraunean zetozen hamahiru emakumeek, gainerakoen txalo artean. Zorion hitzak besterik ez zen entzuten bertaratutako familia eta lagunen artean, begien aurrean zutena sinetsi ezinik. Naiara Peinado Jimenez arraunlariak harro azpimarratu zuen egindako lanaren garrantzia: «Jendeak ez zuen gugan sinesten. Erakutsi dugu posible dela, eta jende horri muturrean eman diogu».

Era berean, ama eta alaba traineru berean ikusteko ere balio izan du erronkak; izan ere, Ainhoa Pozo Lizaso eta Josune Lizaso Aizpurua ama-alabek batera heldu diote erronkari. «Sekula ez dut kirolik egin, eta honek konbentzitu nau. Badakit hemendik aurrera egiten jarraituko dudala», azaldu zuen Josune Lizasok, alaba alboan zuela. Masailak gorri, izerditan blai eta egarri, baina pozez zoratzen iritsi ziren arraunlariak, ametsa zirudiena egia bilakatuz. Utopiatik errealitatera saltoa emateko, taldearekiko konpromisoaren garrantzia azpimarratu nahi izan zuen Ainhoa Pozok, taldearen bozeramaile lanetan: «Hasieran denon artean konpromiso batzuk erabaki, eta idatzi egin genituen». Eta konpromisoari helduz egin zuten aurrera; hain zuzen, hasitakoa bukatzeko beharrean tematuta: «Esandakoa betetzeko konpromiso bat hartzera eramaten zaitu horrek. Taldeko kirol bat da, eta, egiten ez baduzu, taldeari huts egiten diozu. Beraz, egin beharra dago», gehitu zuen Pozok.

Ostegunean ekin zioten bideari, espero baino baldintza zailagoetan. Orion, 07:00etan itsasoratu ziren, baina olatuek ez zieten bidea lasai egiten utzi. Lehen etapa Bermeon (Bizkaia) 12:30ean bukatu behar zuten, baina kostata heldu ziren Getariara (Gipuzkoa). 16:00 arte zain egon behar izan zuten, itsasoa baretu eta Bermeorako bidea hartu ahal izateko. «Ura sartu eta sartu, belauneraino geneukan, eta pisua asko nabaritzen genuen», adierazi zuen Leire Laredo arraunlarietako batek.«Itsasoak gure lekuan jarri gintuen, konturatu ginen askotan ezin zaiola naturari kontra egin», gehitu zuen Nere Manterolak, Laredo alboan zuela.

'Zergatik ez?' proiektua

Ideiaren hazia Oriora joandako kataluniar batek erein zuen, aurtengo maiatzean 40 urte beteko zituela eta. Joan den urteko maiatzean izan zen hori, eta urrian jarri zen martxan taldea. Orioko Arraun Taldearekin harremanetan jartzea erabaki zuten, eta horiek bi baldintza jarri zizkieten: 25 emakumeko taldea osatzea eta euren buruari erronka bat jartzea. Erronka, Oriotik Bilbora arraunean joatea. Orduan jaio zen Zergatik ez? proiektua, emakume horien ideia «zoroa» erronka serio bihurtuz. Inoiz ez dela beranduegi kirola egiten hasteko argudiatuz, bideari ekin zioten 32 emakumeek. 35 urte ditu gazteenak eta 59 beteko ditu aurten taldeko beteranoak, baina ilusioa eta bizipoza ez zaie falta. Hamar hilabete eman dituzte astebururo-astebururo itsasora ateratzen. Tartean, korrikari, mendi igoerari eta ergometroari lotutako arratsalde asko ere igaro dituzte.

Aurretik apenas elkar ezagutzen zuten emakumeek sare indartsua osatzea lortu dute, edozein oztopo gainditzeko gai izan den sarea. Lana, familia eta kirolaren arteko oreka mantentzea ez dela erraza izan aitortu zuten, baina taldearekin hartutako konpromisoa betetzeko nahiak eman die aurrera egiteko indarra. Amore ematekotan ere sarri izan direla aitortu zuten, baina helburu argia izateak bidetik galtzea galarazi die. Gaur hirugarren etapa eta luzeena Ondarroan (Bizkaia) bukatuko dute, eta bihar izango dute egun handia Oriorako bueltan. Festa eta poza, egindako lanaren ordainsaria izango da etxerako buelta.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

 ©Berria

Koronabirusaren azken datuak

Berria

Euskal Herrian 12.066 gaixok eman dute positibo koronabirusaren proba eginda. 737 hil dira. COVID-19 gaitza izandako 3.948 pertsonari eman diete alta. Grafikoak, albiste barruan.

Pertsona bat zebrabidea gurutzatzen, Iruñean. ©Iñigo Uriz / Foku

Alokairu turistikoak, debekatuta Lapurdiko kostaldean

Berria

Munduan 70.000 lagun inguru hil dira COVID-19 eritasunaren eraginez, eta atzemandako kasuak ia 1,3 milioi dira; joan den ostegunean, milioi bat ziren. AEBak eta, bereziki, New York dira pandemiaren epizentro berria. AEBetan, 337.000 positibo baino gehiago baieztatu dira, eta 9.600 lagun hil.. 

Irrintzi konpartsako erraldoiak, Boiseko Basque Blocken, 2015eko Jaialdian ©Urtzi Urrutikoetxea

Diasporako euskal jairik handiena bertan behera utzi dute

Edu Lartzanguren

Boiseko Jaialdi festibala bost urtetik behin egiten dute, eta aurtengo uztailerako zegoen programatuta. Azkenean, 2021eko uztailaren 27tik abuztuaren 1era egitea erabaki dute, "ardurak eraginda".

EGA Euskararen Gaitasun Agiria lortzeko probak. ©Andoni Canellada / Foku

Jaurlaritzak udazkenera arte atzeratuko ditu hizkuntza maila egiaztatzeko probak

Jon O. Urain

Indarrik gabe utzi du maiatzaren 9rako aurreikusitako proba idatzia, eta urrian egingo du. Onartutako eskabideak kontuan hartuko dira bigarren deialdi horretarako.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna