Irungo Zineklubaren ekarpena aztergai, Oteizan

Iragan astean aurkeztu zuen Gasteizko Artium museoak urte berrirako programatu dituzten erakusketen arteko lehena: Pentsatzeko leku bat. Arte-eskolak eta praktika esperimentalak Euskal Herrian, 1957-1979. Mikel Onandiak, Rocio Robles Tardiok eta Sergio Rubirak egin dituzte komisario lanak, eta, Xabier Salaberriarekin elkarlanean, proiektu horren barruan erakusketa berri bat ireki dute Altzuzako (Nafarroa) Oteiza museoan: Begi iragankorra. Irun Zineklubaren proiektua.

Artiumeko erakusketak hemeretzi kasu ditu aztergai, Euskal Herrian sortu zirenak, 1957tik 1979ra bitartean. Ikertzeko eta artisten arteko elkarguneak bilatzeko borondatez sortu ziren denak, hezkuntzari lotutako begirada batekin. Eta hala izan zen Jorge Oteizak, Sao Paoloko Biurtekoan arrakasta izan eta Irunera (Gipuzkoa) itzultzean, sustatu zuen Irungo Zinekluba ere.

Esperientzia artistiko eta kolektibo ugari bultzatu zituen egitasmo hark, eta horiekiko begirada kritiko bat eskaini nahi du orain Altzuzan irekitako erakusketak. 1958an hasi ziren hamabosteroko zineforum eskaintzarekin, eta liburutegi eta aldizkari espezializatuetako harpidetzekin, eta urteekin ugarituz joan zen programazioa. Bide horren une gorenetako bat, euskal arte modernoaren eraikuntzari lotuta, 1961eko Artearen I. Astea izan zen, komisarioen ustez. Arte abstraktuaren eta figuratiboaren inguruko eztabaidak izan ziren orduan pinturaren eta eskulturaren erakusketa laguntzen, zeinak, Oteizaren irudiko, arte garaikidea izan zenaren eta izan behar zuenaren arteko polarizazioa islatzen baitzuen.

Erakusketa apirilaren 24ra arte bisitatu ahalko da.