Miguel eta David Merinok ez dute Aspen jarraituko

Merino anaiei kontraturik ez berritzea erabaki du Aspek. Atzo jakinarazi zuen Eibarko enpresak, webgunean argitaratutako mezu batean. Kontratua abuztu amaierara arte badute ere, lehenago jokatuko dituzte agurreko norgehiagokak. Merino I.ak, hilaren 10ean jokatuko du, Ezkarain (Errioxa, Espainia); Merino II.ak, berriz, abuztuaren 12an, Aoizen (Nafarroa).

Merino I.ak 31 urte ditu, eta11 eman ditu profesionaletan jokatzen. Birritan izan da Bigarren Mailako binakako txapeldunorde. Anaietan gazteenak 28 urte ditu, eta zortzi urtez izan da profesional. Debuta egin eta bi urtera jantzi zuen bere lehen eta azken txapela. Lehen Mailako binakako txapelketa irabazi zuen Titin III.arekin, 2012. urtean, Xala eta Laskurainen aurka.