Espioitza

Asteburu honetan hiritik ihes egin dut. Lagunekin etxe batera joan gara, eta larunbatean mahai joko askotara jokatu genuen. Mahai joko batzuk guk eraman genituen, baina beste batzuk etxean bertan zeuden. Besteak beste Trivial jokoa aurkitu genuen. Aurkitutako edizioa nahiko zaharra zen, eta erantzunen artean Sobietar Batasuna agertzen zen. Telebistarik gabeko asteburua izan da, baina asteburuaren aurretik, Kleo (Netflix) telesaila ikusi nuen. Telesail horrek Trivial zaharraren garaira garamatza, Sobietar Batasuna zegoen urteetara. Zehazki, Berlingo eremu komunistan lan egiten duten espioien bizitzetara gerturatzen gaitu telesail horrek.

Kleo telesailaren protagonista da. Bere lana Berlingo beste aldean pertsonak hiltzea da, eta bere buruzagiek bidaltzen dizkioten misioak maisuki gauzatzen ditu. Azken misioaren ostean, bere bizitzan aldaketak egon daitezkeela uste du, haurdun dagoelako. Baina bere ametsak zapuztu egiten dira ulergaitza gertatuko zaion erabaki baten ostean. Kartzelaratuko dute eta bertan umea galduko du.

Bere atxilotzetik urte batzuetara, Berlingo alde komunista desagertu egin da, eta aske geratuko da. Berlinen gauzatu zen aldaketa agerikoa da. Kleok, aldiz, desberdintasun horiei garrantzia gutxi emango die eta helburu bakarra izango du: mendekua. Sufritutako galera ezingo du ahaztu eta bere atxiloketaren arrazoien atzean nor egon zen jakin nahiko du. Errudunak nor diren jakiten duenean, horiek guztiak hil egingo ditu.

Telesailean zehar emakume espioien presentzia handia aurkitzen dugu. Killing Eve telesailaren ostean, arruntagoa egiten zaigu emakume espioien istorioak ikustea, baina kasu honetan gaur egungoa ez den garai bateko espioiak agertzen dira telesailean. Kleorentzat amatasuna gai oso garrantzitsua da, eta telesailean zehar gai hori jorratzen da. Kleok kartzelan zegoenean bere haurra galtzerakoan, ama izateko aukera ere galdu zuen. Espioitzaren eta amatasunaren uztarketa nolakoa izan daiteken pentsatzea arrotza egiten zait, baina Kleok etsai bati erditzen laguntzen dio istorioaren amaieran. Trivial jokoan ez nuen emakume espioien inguruko galderarik erantzun, baina argi dut Sobietar Batasunean emakume asko lan horietan aritu zirela, eta ez zutela merezitako esker ona jaso.