'Biba Egunean Behin'

Berrikuntza, lau silaba eta karga semantiko handia duen hitza da egunotan. Egunerokotasunean egiten diren zenbait gauzari, aldiz, berriak izanik ere, balio gutxi ematen diegu batzuetan; egunerokoak izateagatik akaso. Egunean behin euskaraz sortu zen galdera-erantzun aplikazioa da horietako bat, eta orain telebistarako salto esperimental arrakastatsua egin du.CodeSyntax euskal enpresaren Egunean behin aplikazioa ezaguna da euskaldunen artean. Egunero 40.000 pertsona inguruk jokatzen dute galdera-erantzunen jokoa, sakelakotan. Herri, auzo, kuadrilla edo kafetegiko taldeetan zeinek irabaziko duen jokatzen dute astero-astero euskaldun askok.

Biba Egunean Behin saioan, New Media Digital produktorarekin batera, telebista formatu hibrido batera eraman zuten jokoa. Hiru erronda eta finala egin zituzten, hamabost minutu inguru iraun zuen programan. Batzuek sakelakoarekin etxean, eta besteek platoan bertan jolasteko aukera izan zuten, oso dinamikoa izan zen saio batean.

Arrakasta datuetan neurtzen bada, 21.000 pertsona inguru egon ziren konektatuta, eta horietatik 18.000 inguruk jokatu zuten. Ohikoa 40.000 pertsonak egunero jolastea bada, arrakasta itzela da ia erdiek erabakitzea telebista aurrean jarri eta jokatzea.

Telebistako datuei begira jarrita, audiometria zaharrarekin alegia, %5,8 inguruko ikusle kuota, 30.000 ikusle inguru, 55.000 kontaktu eta %55,2ko fideltasuna izan omen zuen. Konektatu eta partidak jolastu zituztenen datuari begiratuta, estatistika metodo zaharrekin, ez dakit ez ote den arraroa, baina horiek dira oraindik telebistan erabiltzen diren metrikak. Ezer ez dakienarentzat, datu ezin hobeak dira.

Datuak albo batera utziz, euskaraz horrelako formatuek arrakasta izan dezaketela frogatua gelditu da oraingoan behintzat. Egia da jolasek, modek bezala, beren bizi zikloa dutela, Angry Birds edo Pokemon Go etorri bezala joan ziren, adibidez. Horregatik, esperimentuak egitea bezain garrantzitsua da garaiz egitea.

EITBn egindako moldaketen ondorioz, esperimentu horiek egiteko tokia EitbLab dela dirudi. Esperimentuen ondoren, horiek trinkotzea tokatuko da noizbait. 2019an sortutako aplikazioak bi urte behar izan ditu telebistako formatu batean frogatua izateko. Ea hemendik aurrerakoek.