Barkatu Gira

Etxeko garbiketa-robotak argia piztu du, normalean trabatuta gelditzen da edozein zulotan, baina gaur argia piztea lortu du. Errieta egiteko bulkadari eutsi ahal izan diot orain arte. Nola egingo diot errietan robot bati?

Kristautasun barneratuak errua zeinena den pentsatzera eramaten zaitu maiz, eta honetan ere horrela izan da. Norena da robot batek horrelakoak egitearen errua? Robot hori saltzen duen enpresarena? Programatu duenarena? Erosi eta etxean ikuskaritza gabe utzi duenarena? Bada zerbait ergelagorik errua zeinena den gure buruei galdetzea baino?

Baina zerbait larriagoa izan balitz? Hau da, robotak zerbait lurrera bota izan balu? Maiz gertatzen den moduan kable elektrikoekin trabatu izan balitz, zirkuitulabur bat sortu eta txinparta batek sua sortu izan balu?

Eta kasualitatea ez balitz argia piztu izana? Beste hipotesi bat litzateke, gure robotak argia piztu nahi izatea. Oztopoak saihesteko egokiagoa zela pentsatuko zuen eta zutikako argiaren botoia sakatu orduan. Zentzua du, argi dago robotak autonomia maila bat eskuratu duela, eta bere buruarentzako egokiak diren zenbait erabaki autonomo hartzen dituela orain.

Argia piztu badezake, baina, zergatik geldituko da hor? Hiru astez behin pizteko programatuta daukat robota. Gehiegi dela pentsatu dezake Girak —nire robotaren izena da, orain arte aipatu ez badut ere—, eta aktibatzearen plantak egin, baina bere txokoan gelditu batzutan. Edo, greba batean ere amaitu dezake liskarrak, konpon ezin den matxura arraro baten forman akaso. Erotzen hasia al naiz?

Egongelan gora eta behera nola egiten duen ikustea gustatzen zait; hipnotikoa da. Orduak pasako nituzke hari begira. Horren ordez, kamera batez jarraitu beharko nuke, ni ez nagoenean nola jokatzen duen ikusteko. Baina pentsatu dut ideia txarra izan daitekeela kamera hori sarera konektatuz gero, kontrolagarria izan daitekeelako... Bufff, beno banoa kalera.

Prestatzen hasi, eta ni nagoen gelara bildu da Gira. Ezustekoz, kamixeta buruan nuela oraindik, gerturatu eta hankan jo nauenean atzekaldetik; —Ups, barkatu— Eskapatu zait orduan. Errieta egitearen bulkadari eutsi izan diot maiz, baina barkamena eskatzeari ezin izan diot eutsi.

Onartu egin beharko dut, Gira robota gizatiarrago bihurtzen ari da niretzat, eta horren errua neurea da.