EKOGRAFIAK

'Debatea'

Miren Manias -

2019ko azaroak 6
Espainiako hauteskunde kanpainako telebista eztabaidaren iritzi zutabea duzue gaurkoa. Euskaraz. Gaztelaniazko hedabideek atzoko argitalpenetan jasotakoak osatzeko asmoz. Gobernuburu izateko hautagaien ┬źdebatea┬╗ zuzenean jarraitu nuen, TVEn. Tarteka sofatik altxatu nintzen, halere; audientziarekin konektatzeko politikarien gogo ezak eraginda. Erresuma Batuko azken eztabaida politikoekin alderatuz, kaleko jendearen parte-hartze falta ikusi nuen astelehenekoan. Alderdi kontserbadoreen burua aukeratzeko uztaileko saioan, esaterako, Erresuma Batuko hainbat esparru demografikotako lagunen galderetan oinarritu zuen gidoia BBCk. Areago, zuzenean parte hartzera gonbidatu zituzten lagun horiek. Finean, boto emaileek zer pentsatzen duten jakitea izan beharko luke alderdi politikoen kezkarik handiena. Baita halako eztabaidak antolatzen dituzten telebista kate edo erakunde publikoena ere.

Bestalde, alderdi politikoen aniztasuna urria izan zen. Hau da, ez zuten Kataluniako, Hego Euskal Herriko eta Galiziako ordezkaririk gonbidatu. Bitxia, gutxienez, bada. Izan ere, Kataluniako auziak eztabaidaren minutu gehienak hartu zituen. Pedro Sanchez PSOEko buruak proposamen zehatza egin zuen horren harira: TV3 Kataluniako kate publikoaren administrazio kontseilua aukeratzeko, Parlamentuaren bi herenak behar izatea. Kontua da formula hori urriaren 23tik dagoela onartua. Kultura eta zientzia gaiez, bestalde, eztabaidarik ez zen egon. Ohi legez.

Pablo Iglesias Unidas Podemoseko hautagaia normalean baino motelago antzeman nuen. Gainerako parte hartzaileak oihuka eta elkarri mokoka aritu ziren etengabe, eta horri haien eskuinaldeko diskurtsoak erasten badizkiegu, haserre jarrera indartsuagoa espero nuen Iglesiasengandik. Diotenez, emakumeen botoak erakartzeko estrategia da. Gizonezkoek nahiago izaten baitute oihuak entzutea telebistan. Nork ikusi zuen debatea? Kantar Mediaren arabera, guztira, 8,6 milioi ikusle batu zituen. Gehienak Madrilgo erkidegoan (%64,7) eta Gaztela-Mantxan (%61,1) izan ziren. Aitzitik, Galizian (%47,5), Araban, Bizkaian eta Gipuzkoan (% 44,5) eta Katalunian (%42,1) jarraipen txikiagoa izan zuen. Sexuaren arabera, berriz, gizonezkoen (%56,8) artean arreta handiagoa bereganatu zuen, emakumezkoekin alderatuta (%48,8).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna