Albistea entzun

EKOGRAFIAK

Beranduegi

Lander Arretxea -

2022ko urriak 5

Inoiz zalantza egin baduzu, nik emango dizut erantzuna. Bai, berandu iristeko joera kontroalezina dugunok ere urduritzen gara beste aldean —zain dagoenarenean, alegia— tokatuz gero. Pazientzia ez da nire dohainen zerrendan ageri. Azken saiakeran, hilabetez eutsi diot tentazioari. Irailaren 2an plazaratu zuten The Lord of The Rings: Rings of Power, eta pisukideek lehen astetik heldu bazioten ere, nik egongelatik ihes egin dut aldiro. Zergatik? Iragarri zutelako laster, oso laster, izango genuela euskaraz bikoiztuta ikusteko aukera.

Baina badoaz asteak hegan, zabaldu dituzte dagoeneko sei atal, eta tarteka konprobatzen dudan arren, ez da oraindik hizkuntza zerrenda luzean ageri —azpitituluak badaude hasieratik—. Galegoa dago, katalana, eta baita beste hogei bat hizkuntza ere. Euskara ez. Noiz gaituko duten jakiterik ere ez dago. Iruditu zait hilabeteko esperoa nahikoa dela euskaltzale zintzoaren txartela ez galtzeko. Beraz, bai: asteburuan eman dut amore. Eta bekatu bakarra nahikoa ez denez, gaztelaniaz ikusi dut, gainera, azpitituluen aukera baliatu gabe.

Telesailaz esan daitezkeenak baldintzatuta daude, ezinbestean, lehiakide edo lehengusu duen House Of Dragons-en konparazioarekin. Hiru ezaugarrik bereizten dute harengandik, eta hirurek egiten diote mesede: trama edo pertsonaia nagusi ugari ditu; umorezko sekuentziak tartekatzen dira; eta faktura ezin finagoa du. Aurrekontu potoloetan potoloena ere bai, dena esan behar bada. Protagonisten artean emakumeak ere badaudela da berritasun nabarmenena. The Lord of The Rings-ek zaletu zituenak aseko ditu, eta beharbada baita beste makina bat ere. Gure etxean, filmak ikusi ez zituztenak telesailaren aitzakian ari dira orain trilogia berreskuratzen. Berandu, baina ez beranduegi.

Beranduegi iritsiko dena euskarazko bikoizketa izango da. Denak Astigarragara edo Errenteriara joanak direnean, Donostian bizi diren gazteei diru laguntzak eskaintzea bezala da. Edo erantzun zuzenaz akordatzea Egunean Behin-eko aukera okerra sakatu eta gero.

Antsietatearen milurtea da hau. Dena da atzoko eta dena iragankorra. Iragarpena ospatu zutenek haserre behar dute. Zein balio du modako telesaila euskaratzeak ikusi nahi zuten den-denek ordurako goitik behera irentsi badute?

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Filip Albor, Amaia Karrere eta Arantxa Hirigoien, <em>Ttinka</em> disko-liburuaren egileak. ©MATHIEU HARANBURU/ BELARRI

«Ikusi dut gauza gutirekin anitz pasarazten ahal dela»

Ainize Madariaga

'Ttinka' disko-liburua plazaratu du Hirigoienek, Filip Albor eta Amaia Karrerekin batera.Ttipitik «on» denez kantuak eta ipuinak euskaraz entzutea, haurren beharretara egokitu dute obra.
Jon Zabaleta, HernaniKomik azokan emandako Joseph Camino saria eskuetan duela. ©JON URBE / FOKU

«Marrazteak goizero jaikitzen laguntzen dit»

Enekoitz Telleria Sarriegi

Trazu ezberdin asko dituen bineta erraldoi bat da Zabaletaren bizitza, marrazkiz zirriborratu duena. Hernani bere jaioterrian saritu dute, eta euskal komikiari egindako ekarpena aitortu.
 ©MONIKA DEL VALLE / @FOKU

«Euskaraldia oso neorrealista da»

Urtzi Urkizu

ETB1ek 'Dailobit' saioaren bigarren atala emango du gaur, Euskaraldian izandako bizipenekin. Rutak Leire Palaciosekin batera aurkezten du programa. «Naturaltasunez agertzen saiatzen naiz».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.