Teknologia

Etxeko telebista aldatu nahi dut. Etxean dudan pantaila zaharkitua geratu zait; telefono konpainiak bidali zidan azken kodifikatzailea konfiguratu nuenean, telebista nahiko zaharra zela adierazi zidan kodifikatzailearen abisu batek. Telebista berria nolakoa nahi nuen pentsatzerakoan gauza asko kontuan hartu behar izan ditut, baina garrantzitsuena tamaina izan da. Etxean dudan telebista txikia da, eta handiago bat erosi nahi nuen. Horretarako, sofaren aurrean dagoen tartea neurtu ostean, teknologia berriena duten telebistak etxeko tartea baino handiagoak direla konturatu naiz. Beraz, azken teknologia duten telebistak alboratu ditut, tamaina ertaina duen bat aurkitzeko.

Etxeko aparatuaren aldaketak telebistaren transformazioa burura ekarri dit. Plataformak etxeetara iritsi zirenetik, pantaila txikiaren aurrean dauzkagun ohiturak aldatu egin dira. Telebista etxeko gailu preziatua da, eta azken urteetan bere aurrean ordu asko ematen ditugu. Telebista tradizionala ikusteko ez ezik telesailak eta filmak ikusteko erabiltzen dugunez, pantailaren tamaina handitu egin da zinemaren sentsazioa egongelan sortzeko.Plataformek ere aldaketak jasan dituzte. Gure harpidetza partekatzeko gonbidapena egiten ziguten plataformek lehen, eta kontua elkarbanatzeko trabak jartzen hasi dira orain. Netflixen traba horrek eztabaida sortu du, eta erabiltzaile batzuek bertan behera utzi dute harpidetza. Plataforman jarraitu dugunok traba horiek akatsen bat izan dutela konturatu gara, eta kontuak berdin jarraitzen duela ikusi dugu. Beste askok zailtasunak izan dituzte etxeko helbidea zein den adierazteko.

Teknologia aldatzen den heinean, telebistako formatuak aldatu egiten dira. Telebista kate tradizionalak talde handi baten parte dira eta arau berriak dituzte. Mediaset taldeak, esaterako, entretenimenduko saioetan politika debekatu du. Modu horretan, Sálvame saioan ezingo dituzte adierazpen politikoak egin. Lander Arretxeak kalera ateratzeko deia egin zuen atzo; agian, saioaren jarraitzaileak eta langileak kalera atera beharko lirateke neurri hori salatzeko. Adierazpen askatasuna murrizten den heinean, telebistak saltzen diren saltokietan jendeak merkatuko telebista onena bilatzen jarraitzen du. Nik, bitartean, nire egongelan ondo sartuko denaren bila jarraituko dut.