Dirua

Aste honetan Succession (HBO Max) telesaila denen ahotan dago. Roy familia faltan ematen genuen, eta senideen arteko gorrotoa eta azpijokoak ikusteko irrikitan geunden. Azken denboraldiko lehen kapituluan, familia banatuta aurkitu dugu. Alde batetik, aita eta bere jarraitzaileak, eta, bestetik, bere seme-alabak. Bi taldeak lehian ari dira, eta beren negozioekin aurrera egin nahi dute. Badirudi Roy familiako seme-alabek enpresa berri bat sortu nahi dutela, baina, haien botere nahiaren ondorioz, aitaren kontra lehiatzeko bidean jarriko dira.

Lehia horretara iritsi baino lehen, Roy familiako burua bere urtebetetzea ospatzen ari da New Yorken. Festan jende asko dago, baina maitasun gutxi. Festa horretan sentimenduek ez dute garrantzirik, itxurakeriaz beterik zegoelako. Logan Royk bere festatik ihes egiten du, eta langile batekin afaltzera irtengo da. Langile horri bere lagun onena dela aitortuko dio. Erositako laguntasunarekin konformatzen da.

Bitartean, Shivek bere senarraren deiak jasotzen ditu. Dei horietan bien arteko erlazioan dagoen haustura nabaria da. Senarrak emandako informazioari esker, Logan Royren seme-alabek estrategia aldatuko dute.

Telesailaren jarraitzaileok aspalditik dakigu familia horretan maitasuna ez dela garrantzitsua. Diru kantitate handien inguruan hitz egiten dute une oro kapituluan zehar, eta hori da haientzat garrantzitsuena: haien kontu korrontean duten diru kantitatea, eta horrek eman diezaiekeen boterea.

Telesaileko pertsonaientzat hori da garrantzia duen bakarra: kapitalismoaren gailurrean bizi dira. Gure etxeko sofatik beren ardura horiez barre egiteko aukera dugu. Diruak ez duela zoriontasuna ekartzen argi dugu, baina dirudunak horretaz baliatzen dira nahi dutena erosteko. Atzo albiste izan zen Ana Obregonek ume bat erosi duela AEBetan. Madrilgo aktore eta aurkezlea ospitaletik gurpil aulki batean atera zen. Argazkiak atera dizkiote, eta horrek eztabaida handia piztu du Espainian.

Roy familia hautsita dago diruak dakarren handinahikeriaren ondorioz. Obregonek, aldiz, familia berria sortu nahi du diruaren bitartez. Diru gutxiagorekin bizi garenok dugun familia hobeto baloratzeko aukera dugu, eta agian maitasunaren bila ez dugu hain urruti joan beharrik.