Lander Arretxea.
EKOGRAFIAK

Aste erabakigarria

2023ko maiatzaren 24a
00:00
Entzun
Orain bai: iritsi da aste erabakigarria. Igandea gero eta gertuago dago. Hilabete luzeak eman dituzte denek prestaketetan: taldeak osatzen, egitekoak errepasatzen, estrategia zirriborratzen. Kazetariak eta aditu sutsuenak euren pronostikoekin hasi zirela badira gutxienez bost hilabete. Baina egiazko lehia zein arreta mediatikoa aste gutxi hauetan kontzentratzen dira. Orain da porra, kiniela eta lagunarteko eztabaiden garaia. Polemika gutxi batzuen zaratak bete ditu albistegiak eta egunkarien azalak. Baita Twitterreko ika-mika gehienean antzuak ere. Baina bien bitartean, atzerako kontaketak beheranzko bidean jarraitzen du, geldiezin.

Izango da, lagunarteko kiniela horiek hauspotuta, asteotako martxa aspergarria telebistaz jarraitu duenik. Eta hala bada, batzuen eta besteen estrategiaren berri izango du dagoeneko. Baina beste askok azkeneko egunetan soilik eskainiko diote arreta: orain ikusiko baititugu hautagai nagusiak parez pare, nor bere argumentuekin, historikoa izango den —beti izaten da historikoa— balizko emaitzaren bila. Aurreikuspenak alde dituztenak kontserbadore jokatzen, eta aukera gutxi omen dutenak ausart eta baikor. «Itxaropena ezin da galdu azken segundora arte». Laster argituko dugu auzia: nork eramango du etxera Italiako Giroko maglia arrosa? Nor izango du aldameneko bi postu txalogarrietan?

Aurretik esandako guztiak hauteskunde girora eraman bazaitu, lasai, ez da harritzekoa. Kirol emankizunez bezainbeste eztabaida politikoaz aritzeko balio duten esamoldeekin Osakidetzako itxaron zerrendak baino luzeagoa den segida osatu daiteke. Telebisten trataeraz beste horrenbeste esan daiteke: debateak lehiak dira; boteretsuenei eskaintzen zaie denbora gehien; eta kirolariek bezala, politikari mordoak buruz ikasitako esaldi hutsalak errepikatzen ditu. Kazetariak berberak dira tarteka. Aurten Italiako Giroan ez badago ere, bietan ikusi izan dugu Xabier Usabiaga: txirrindularien zein batzarkideen emaitzen berri ematen. Asko dago jokoan igande honetan. Etxebizitza eskubideari, gizarte zerbitzuei, euskarari eta beste makina bat gairi eragingo diete herriz herriko emaitzek. Ezin esan arduratzen ez nauenik. Baina telebistara joz gero, nahiago Italiako Giroa, giro politiko zakartu hau baino.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.