Iruñeko Sanferminak

Txupinazoa zuzentzeko ardura

Pamplonesa musika bandak botako du sanferminetako txupinazoa, iruindarrek boto bidez hori erabaki ondoren. Jesus Garisoain bandako zuzendariordeak piztuko du suziria
Jesus Garisoain Pamplonesako zuzendariordea iazko sanferminetan, makila eskuan dianak zuzentzen.
Jesus Garisoain Pamplonesako zuzendariordea iazko sanferminetan, makila eskuan dianak zuzentzen. IDOIA ZABALETA / FOKU

Iker Tubia -

2019ko ekainak 13
Txupinazoa jaurtitzeko tenorean, Iruñeko udaletxeko sarreran zain egoten da Pamplonesa musika banda, gaitero eta txistulariekin batera. Suziriak eztanda egin bezain pronto, haiek arduratzen dira lehenbiziko obra jotzeaz: Gaintza biribilketa. Bestaren lehen doinua da. Aurten, lehenbiziko ekitaldia gidatzea dagokio, ordea, Iruñeko musika bandari: txupinazoa botatzeko aukeratu dute iruindarrek. Jesus Garisoain bandako zuzendariordeak botako du bandaren izenean.

Ia aho batez erabaki dute iruindarrek Pamplonesak abiatuko dituela Iruñeko bestak. 9.472 hiritarrek eman dute botoa, eta ia boto guziak eskuratu ditu: %92,1. Aurten, bi hautagai baizik ez ziren: musika banda eta Luis Sabalza Osasunako lehendakaria. Pamplonesak ehun urte bete ditu, eta urteurreneko ospakizunak borobiltzeko modua izanen dute uztailaren 6an udaletxeko balkoira aterata. Atzo jakinarazi zuten suziria nork botako zuen, eta Jose Andres Palacios Pamplonesako lehendakaria hunkiturik agertu zen prentsaren aurrean. Hitzak ezin atera ibili zen hasieran: «Mila esker, Iruñea».

Palaciosek besta hasiera berezia iragarri zuen, Garisoaini erreferentzia eginez: «Aurten ez dugu txupinazoa botako, aurten txupinazoa zuzenduko dugu». Zuzendari makila eskuan botako duela aurreratu zuen. Udaletxeko hirugarren pisuko balkoian pizten da suziria, eta aretoan bandako kide gehienak egotea nahiko luketela esan zuen Palaciosek. Are, iradoki zuen Gaintza biribilketa atarian jo beharrean, han bertan jo dezaketela.

Lehendakariak esan zuen gaur egun Pamplonesa «maila artistikorik onenean» dagoela, eta nabarmendu zuen bide horretan, besteak beste, Garisoainen lana beharrezkoa izan dela. Hala erabaki dute bandako kideek. «Bandaren balioak eta oinarriak oso ongi islatzen ditu, eta hori transmititu nahi dugu».

Joseba Asiron Iruñeko jarduneko alkatearen arabera, Pamplonesak «oso modu fidelean» ordezkatuko ditu iruindarrak uztailaren 6an: «Pamplonesa esatean, Iruñea esaten dugu, eta sanferminak». Hiriburuko garai eta jarduera nagusietan bandak jo duela gogoratu zuen, eta belaunaldiz belaunaldi musika zabaldu dutela. «Horregatik, Pamplonesak erabat merezi du aitorpen hau».

Ehun urte

«Bandaren ehun urteetan, garai zoragarriak izan dira, eta hau, txupinazoa botatzeko aukera, oso berezia izanen da guretzat», aipatu zuen Palaciosek. Zenbait izen etorri zitzaizkion burura: Cervantes anaiak, Manuel Turrillas, Ricardo Garcia Cerda, Maritorena, Zugarrondo... eta bandan aritu diren «milaka» musikariak ere bai. «Gogoratu nahi ditut Pamplonesaren izana mantentzeko goizeko bostetan esnatu diren horiek». Izan ere, lehen dianak ordubete lehenago jotzen zituzten, entzierroa ere ordubete lehenago hasten baitzen.

Mikrofonoa aurrean zuela aprobetxaturik, Palaciosek esan zuen bandak «oso garrantzitsuak» direla herrietan. «Banda egunero zaindu behar da. Herriak herriarentzat egiten duen zerbait da; kultura da, eta herri guzietan bandak sustatu behar ditugu». Atzean musika eskola ere egoten dela gogorarazi zuen. Horregatik, Pamplonesak ez ezik, suziria Iruñeak ere botako duela esan zuen. Beste hautagaia gogoratu zuen: «Osasuna eta Pamplonesa elkarri lotuta ibili gara beti». Uztailaren 6an turutek eta tinbalek emanen diote paso Pamplonesari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna