gorka julio
IRLEN SAREA

Txipen borrokak

2020ko irailaren 26a
00:00
Entzun
Pieza txiki bezain garrantzitsu baten ondorioz lehertu daiteke hurrengo gerrate mundiala: txipak. Txipen ekoizpena da une honetan Txina eta AEBen arteko gerra hotzaren puntu beroa. Ekoizpen horren kontrolean jokatuko da hurrengo urteetako botere hegemonia.

AEBen eta Txinaren arteko gerra teknologikoaren ondorioz, azken hilabeteetan, Pekinen erdieroaleen independentzia lortzeko asmoak indarberritu ditu. Ezinbesteko zaizkion erdieroaleen industrian inbertsio eta ahalegin bereziak egiten ari da, baina oraindik teknologikoki mugatuak dira saiakeren emaitzak. Horregatik ere, ezinbesteko pieza zaizkion txipak lortzeko erosketak egitera behartuta dago Txina.

Saiakera horiek ikusita, Trumpen gobernuak bere asmoak zapuzteko ahaleginak areagotu ditu eta txipa fabrikatzen dituen Taiwan, borrokaren erdian gelditu da, bi erraldoien arteko lehian.

AEBetako gobernuak bi estrategia teknologiko abiatu ditu Txinari teknologia handiko hornikuntza kateetarako sarbidea mozteko. Lehena, Huawei bezalako enpresak zigortzea, beren garapen teknologikoa mugatzeko txipen produkzioan egin ditzakeen aurrerapenak geldotzeko, baina baita txipak erosteko zailtasunak jarriz. Bigarrena, aldiz, Taiwan bere orbitara hurbiltzeko saiakera izan da. Taiwanek Txinarekin daukan lurraldetasun gatazka eta AEBetako softwarea eta teknologiekiko mendekotasuna baliatuz erakarri nahi dute beren interesetara.

Gailu elektronikoen barruan dauden eta nanometroetako teknologia darabilten txip horien nagusitasunak zeinek edukiko duen dago jokoan. Horrek markatuko du herrialde baten garapen teknologikoaren ibilbidea. Izan egunero erabiltzen ditugun sakelakoetan erabiltzen dugulako, espazio-ontzien teknologiarako edota datu analisi eta ustiaketa egiteko aukerak biderkatuko dituelako.

Txinak gauza askotan, AEBen betierekoa zirudien hegemonia gainditu du, baina txipetan oraindik nagusitasun hori ez du lortu. Horregatik erabaki dute AEBek hortik erasotzea aipatutako bi errailetan, denbora irabazteko aukera izango duelakoan; baina denbora zertarako? Borroka teknologikoan aurrera egitea edo saihestea gero eta zailagoa dirudien gerra bat prestatzeko. Txipen borrokak lehertu dezake beste munduko gerra bat? Espero dezagun ezetz.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.