Pentsatzeko, ekin

Aste honetan Euskalherriadigitala.eus manifestua eta plataforma kooperatibismoari buruzko jardunaldi bat aurkeztu dituzte. Zerbait mugitzen ari den seinale dira bi egitasmoak. Inertziarekin hautsi eta gure buruak pentsatzeko eta praktika berriak martxan jartzeko gai izango gara?

Arlo sozio-politikoko, -ekonomikoko, -teknologikoko eta hezkuntzari lotutako agenteek zein norbanakoek Euskal Herria Digitala manifestua argitaratu dute. Manifestuan azken hamarkadetan bizkortu egin diren sistema kapitalistaren egiturazko zenbait fenomeno, hala nola finantza-globalizazioa, lanaren prekarizazioa, demokraziaren pribatizazioa edo berotze globala salatzen dute. Hortaz gain, garapen teknologikoan eman diren aurrerapenak ikusita, garapen hori soilik elite finantziarioaren alde egon ordez, jendartearen zerbitzura jar dadin lortzea dute helburu. Garapen teknologiko horrek demokrazian, lan munduan, hezkuntzan eta humanitatean izan dezakeen eragina aztertu eta sare moduan aritu, aditu eta herritarrez osatutako sare bat mobilizatu nahi dute horretarako.

Aldi berean, uztailaren 1ean, Arrasateko Polo Garaian, Plataforma Kooperatibismoaren inguruko jardunaldi bat izango da. Plataforma-Kapitalismo bortitzenari aurre egiteko egiturak sortzeko tresna tekniko eta sozioekonomikoak ere badirela eta Plataforma-Kooperatibismoa zer den sozializatzea dute helburu antolatzaileek. Kooperatibismoak XXI. mendeko teknologiekin topo egitea proposatzen dute; ez baliabide/lanabes bakar bezala, baizik eta erantzun antolatua emateko tresna gisa. Plataformak ez ezik, horien inguruko ekosistema kooperatibo bat sortzea ere garrantzitsua da horretarako eta hori Euskal Herrian, ezinbestean, lan kooperatiboaren tradizioarekin eta genealogiarekin lotzea dakar. Erronka, beraz, aukera berriak jende gehiagorentzat irekitzea izango da, lan kooperatibetan errotuta dagoen lanaren burujabetzaren kontzeptua mantenduta.

Ekosistema kooperatibo digital lurraldetu bat eraikitzeko, beraz, denon artean pentsamendu eta praktikak produzitu beharko ditugu, beste batek pentsatutakoak edo sortutakoak erreproduzitu nahi ez baditugu. Pertsonak erreproduzitzeaz gain, produzitu ere egiten gara, horregatik dira garrantzitsuak gauzak beste era batera izan daitezkeela erakusten diguten egitasmo mota horiek.