Albistea entzun

ELAk lan erreforma ez babesteko eskatu die EAJri eta EH Bilduri

Sindikatuak uste du dekretua bozkatu aurretik mobilizazio handiak antolatzeko tartea dagoela, eta ez du alboratu greba orokorra. Lakuntza: «Patronala pozik dago, erraz kaleratzen jarrai dezakeelako»
Mitxel Lakuntza ELAko idazkari nagusia eta Peio Igeregi sindikatuko negoziazio kolektiboko arduraduna.
Mitxel Lakuntza ELAko idazkari nagusia eta Peio Igeregi sindikatuko negoziazio kolektiboko arduraduna. ARITZ LOIOLA / FOKU Tamaina handiagoan ikusi

Imanol Magro Eizmendi -

2022ko urtarrilak 12 - Bilbo

ELAk mezu argia bidali die EAJri eta EH Bilduri: «Lan erreformaren aurka bozkatzeko eskatzen diegu. Hura indargabetzeko aukera bizirik mantendu behar dute». Sindikatu abertzaleak Espainiako Gobernuaren proposamenaren azterketa oso kritikoa egin du: argi du aurreko erreformak ez direla indargabetu, eta iritzi dio hau onartuko balitz haiek indargabetzeko aukera «lurperatuko» litzakeela. Horregatik, hura oztopatzeko azken ahaleginak merezi duela uste du, eta hurrengo asteetan mobilizazio handiak egiteko prest agertu da, baita dekretuaren bozketaren aurretik greba orokorrera deitzeko ere.

Mitxel Lakuntza ELAko idazkari nagusiaren ustez, oraindik ez da beranduegi Espainiako Gobernuak eginiko lan erreforma indargabetu eta «berriz zerotik hasteko». Aurka dauden sindikatu eta erakundeek azken hitza esateko dute, eta «ahalik eta erantzun sendoena» antolatzen saiatuko direla iragarri du. Mobilizazioen bitartez, azaldu nahi dute erreforma proposamen hau «iruzurra» dela, eta beste sindikatuekin negoziazioak hasi dituzte protesta horiek noraino eraman daitezkeen aztertzeko.

Baina, iazko urte amaieran LABekin izandako desadostasunen ondoren posible al da greba orokorrerako deialdia? Baietz dirudi. «Ez gaude epez kanpo. Urtarrila lan hilabetea da. Beti izan dugu aukera hori presente. Greba orokorra hamar eguneko epearekin deitu behar da, eta abenduaren 28az geroztik ezagutzen ditugu xehetasunak. Gainera, ikusteko dago zenbat irauten duen film honek». Film hori proposamena onartua izateko negoziazioak dira, eta Espainiako Gobernuak otsailaren 7ko epea du dekretua bozkatzeko.

Bozketa horretan datza ELAren itxaropena, Espainiako Gobernuari babesa eman dioten hainbat alderdik ezetz bozkatuko dutelakoan. Hala eskatu die EAJri eta EH Bilduri, eta, aitortu duenez, etengabeko harremana du haiekin. Dena den, ez daki biek aurka egingo ote duten: ELAren arabera, EAJk gustuko du erreforma, eta lan itunen estatalizazioa da haren iritzia baldintzatzen duen aldagai bakarra. «Horiek hala, koherentziaz, aurka bozkatu beharko luke, baina haiei egin beharreko galdera da hori». Elkarrekin Podemos ere hartu du hizpide, eta kritika zorrotza egin dio Lakuntzak: «Bere usteei uko egin die. Akordioari garrantzi handiagoa eman dio erreformaren muinari baino». Alde horretatik, gehitu du patronalak pozik egoteko arrazoiak dituela, «erraztasun osoz kaleratzen» jarraitu ahal izango duelako.

Elkarrekin Podemosi eginiko kritika Espainiako Gobernura luzatu du, hiru ardatz hartuta. Batetik, egotzi dio ez duela hauteskunde programa bete, eta gezurretan ibili dela. Bestetik, «fribolitatea» leporatu dio, bere hitza bete ez eta alderdi subiranistei babesa eskatu dielako. Eta, azkenik, «jokatzeko modua», elkarrizketa sozialaren mahaia eta dekretuaren bidea erabili dituelako, parlamentuko eztabaida saihestuz. «Eta nola izan da hori posible?» galdetu du Lakuntzak: «Bada, elkarrizketa sozialaren mahaiaren bitartez. Mahai hori tranpa da sindikatuentzat, altxorra patronalarentzat eta koartada ezkerreko alderdientzat».

EAJ, «negoziatzen»

Lakuntzak EAJren inguruan esanikoa berretsi du Josune Gorospe alderdi jeltzaleko diputatuak. Aitortu du Espainiako Gobernuarekin negoziatzen ari dela, eta baita beren jarrera argitu ere: «Autonomia mailako lan itunen lehentasuna babestu ezean aurka bozkatuko dugula esan diogu». Gorospek, gainera, eskatu du «espresuki» sar dadila lehentasun hori: «Hain garbi badago zergatik ez den babes hori gehitu, oso erraza izango da eranstea. Gure eskuduntza alorretan atzera egiterik ez dugu onartuko».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Emakume bat bitcoin-ak diru gisa onartzen dituen okindegi batean, Santa Tecla hirian (El Salvador).. ©Rodrigo Sura / Efe

Kriptodiruak: birtualak ez diren galerak

Iker Aranburu

Bitcoinen eta beste diru digitalen balioa amildu egin da, eta 'luna' izenekoa, berriz, desagertu. Inbertitzaileak arrisku handiko aktiboetatik alde egiten ari dira. El Salvador arriskuan jarri du erorialdiak, bitcoinen aldeko apustua egin baitu

Irizar E-mobilityko langileek 22 egunez itxi dituzte lantegiko sarrerak ©Jon Urbe (Foku)

Irizar E-mobilityko greba bertan behera utzi dute, ituna adostu ondoren

Jokin Sagarzazu

Langile batzordeak egindako bost eskaerak sartuko dituzte hitzarmenean, eta soldata igoera izango dute. 22 egun egin dituzte greban.

Bizkaiko metalgintzako sindikatuek LHKren aurrean deituriko mobilizazioa. ©Marisol Ramirez / FOKU

Lehen greba hotsak iritsi dira Bizkaiko metalgintzara

Imanol Magro Eizmendi

ELAk, LABek, CCOOk eta UGTk plataforma bateratu bat osatu dute lan hitzarmena negoziatzeko, eta patronalari jakinarazi diote ez dutela nahi negoziazioak gehiegi luza daitezen.

<b>Funtzionarioak.</b> Langileak, Jaurlaritzako administrazio orokorreko egoitzara sartzen, aste honetan. ©RAUL BOGAJO / FOKU

Lehian beren postuengatik

Jokin Sagarzazu

Administrazioak oposizio deialdi bereziak iragartzen ari dira, behin-behineko lanpostuak finkatzeko; zehaztu gabe daude zein, baina ez dira guztiak aterako. «Oposizio malguak» izango dira, eta hautaketa irizpideak argitu behar dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.