Noiz sortua: 2020-01-29 00:30:00

Cebek: «U-30eko greba deialdia arduragabea eta elektoralista da»

Iñaki Garcinuño Bizkaiko patronaleko presidenteak gogor jo du ELA eta LAB sindikatuen aurka. Confebasken eta Gipuzkoako Patronalaren ustez, deialdia «zentzugabea» da

Paulo Ostolaza -

2020ko urtarrilak 29

Iñaki Garcinuño Cebek Bizkaiko patronaleko presidenteak ELA eta LAB sindikatuak kritikatu zituen atzo, biharko greba orokor egunaren harira. Haren iritziz, deialdia «arduragabea, neurrigabea eta desegokia da», eta grebaren izaera politikoa gaitzetsi zuen: «Mitxel Lakuntzak berak [ELAko idazkari nagusiak] aitortu du greba politikoa dela, baina ez omen da deialdi elektoralista; ez dakit nola izendatu Eusko Jaurlaritzaren parean egin dituzten kontzentrazioak».

Sindikatuen aurka egiteko, Arabako, Bizkaiko eta Gipuzkoako egoera sozioekonomikoari erreparatu zien Garcinuñok. Enpresaburuaren ustez, grebaren jatorria «euskal errealitatetik at» egindako analisi bat da: «Euskadi goiko postuetan dago aldagai guztietan; estatuko soldatarik handienak eta lanaldirik motzenak mespretxatzen dituzte, eta, prekaritateari dagokionez, berriz, Euskadiko kontraturik gehienak finkoak dira».

ELAren eta LABen eskariak ere arbuiatu zituen Cebekeko presidenteak; haren arabera, «EAEko gizarte zerbitzuak herrialde askoren inbidia dira». Gutxieneko pentsioan 1.080 eurora igotzea, adibidez, «sinplea bezain ezinezkoa» dela iruditzen zaio, eta sindikatuei ohartarazi zien horrela jarraituz gero pentsiodunen mugimendua apurtuko dutela.

Duela aste batzuk, lau eskaera biltzen zituen txosten bat eman zieten sindikatuek Cebekeko arduradunei; proposamen horiei, berriz, ironiaz erantzun zien Garcinuñok: «Edozein patronalen eskura dauden eskakizunak dira: esan digutenez, astean 35 ordu baino gehiago lan eginez gero, gehiegizko lan karga sortzen da, eta hori kaltegarri da osasunarentzat».

Bizkaiko patronaleko burua izan zen gogorren mintzatu zena, baina Pedro Esnaola Gipuzkoako enpresarien burua eta Eduardo Zubiaurre Confebaskekoa ere oso kritikoak izan ziren. Esnaolaren iritziz, deialdi «heterogeneoa» da, «behar eta sentsibilitate ezberdinak» batu dituelako, baina «ez du zer konpontzen». Zubiaurreren ustez, Euskal Herriko egoera «oso urrun dago grebaren deitzaileak zabaltzen saiatzen ari diren larritasun irudia eta alarmatik». Confebaskeko buruak adjektibo ugari erabili zituen deialdia arbuiatzeko: «ulertezina», «zentzugabea», eta «nahiko arduragabea» iritzi dio.

Josu Erkoreka Jaurlaritzako bozeramaileak ere hartu zuen greba hizpide, eta, haren ustez, greba deialdia «gehiegizkoa» da, eta klabe politikoan kokatu zuen. «Deitzaile entzutetsu batek ere onartu du greba politiko bat dela. Bada, greba orokorra eta hauteskunde urtea... argi eta garbi».

Erasoak Lanbiden

Borja Belandia Lanbideko zuzendari nagusiak, berriz, euren hainbat bulegotan azken egunetan jasandako erasoak gaitzetsi zituen. Besteak beste, Salburua Gasteizko auzokoa, Santurtzikoa eta Lasarte-Oriakoak aipatu zituen. Azken horretan, eta Belandiak azaldu zuenez, pintaketak egin zituzten gazteek segurtasun zaindariari ere eraso egin zioten. Bultza egin, lurrera bota, eta zauritu egin zen.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 26an eguneratua, 20:00etan. ©BERRIA

Koronabirusaren azken datuak

Berria

Azkeneko 24 orduetan zazpi pertsona hil dira COVID-19 gaitzaren eraginez, 11 positibo atzeman dituzte PCR probekin, eta lau gaixo ospitaleratu dituzte. Euskal Herrian 28.634 gaixok eman dute positibo guztira, koronabirusa atzemateko probaren bat eginda. Horietatik 2.027 hil dira. Grafikoak, albiste barruan.

Berra adinekoen egoitza. ©JON URBE / FOKU

Ekainaren 8tik egin ahalko dira bisitak Gipuzkoako zahar etxeetan

Berria

Egoiliar bakoitzeko senide bakarra joan ahal izango da bisitan, eta segurtasun neurriak zorroztuko dituzte. Gipuzkoako zahar etxeetan 167 pertsona hil dira izurria hasi zenetik; gaur egun 22 eri daude, bi egoitzatan.

Maiatzaren 11an igaro zen lehen fasera Hegoaldea ©Marisol Ramirez, Foku

Hegoaldea lehen fasera igaro izanaren arrazoiak eman ditu Espainiako Gobernuak

Ainhoa Larretxea Agirre

Espainiako Osasun Ministerioak zehaztu du egoera epidemiologiko «ona» izan dela Nafarroa pasatzeko arrazoia; Osakidetzak pazienteak artatzeko duen «gaitasun handia», berriz, Araba, Bizkaia eta Gipuzkoa igarotzekoa. Maiatzaren 11n aldatu zen lehen fasera Hegoaldea.

Txagorritxu ospitaleko laborategiko irudi bat. ©Gorka Rubio / Foku

Datuen peskizan (eguneko laburpena)

Pello Urzelai

Beste zazpi pertsona gehitu behar dira koronabirusarekin hildakoen zerrendara. Bost EAEn, bi Nafarroan. PCR bidezko 11 positibo berri agertu dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna