Noiz sortua: 2019-11-05 00:30:00

Ezegonkortasun kronikoa

Azken hileko bigarren protesta boladan daude Iraken. Poliziak zazpi pertsona hil ditu Bagdaden. Gobernuak neurri batzuk iragarri ditu, baina Abdelmahdi lehen ministroak ez du dimisioa eman
Manifestari bat Iraneko enbaxadaren harresiaren gainean, herenegun, Kerbalan (Irak).
Manifestari bat Iraneko enbaxadaren harresiaren gainean, herenegun, Kerbalan (Irak). FURQAN AL-AARAJI / EFE Tamaina handiagoan ikusi

Paulo Ostolaza -

2019ko azaroak 5
Azken hilabetean gobernuaren aurka egindako protesten bigarren bolada baretu ezinik dabiltza Irakeko agintariak. Herritarrak haserrearazi dituzte langabezia tasa altuak, ondasunen banaketa bidegabeak eta politikarien ustelkeriak, baita horiei leporatzen dieten Iranen eta AEBen interesekiko gertutasunak ere. Urriaren hasierako protestetan segurtasun indarrek emandako erantzun gogorrak areagotu egin zuen herritarren haserrea, lasaitu beharrean. Egoera konpontzeko, neurri sozialak eta ustelkeriaren aurkako formulak iragarri ditu Adel Abdelmahdi lehen ministroak.

Irakeko iturri ofizialek ez dute eman biktimen daturik lehengo asteazkenetik, baina, beste zenbait iturriren arabera, hilak hirurehun inguru dira urriaren hasieran protestak hasi zirenetik, eta zaurituak, berriz, 9.000 baino gehiago. Atzo bertan, Polizia indarrek gutxienez zazpi pertsona hil zituzten Bagdaden, manifestariak negar gasekin eta ur zurrustekin sakabanatzen ari zirela. Herenegun, berriz, lau pertsona hil zituzten Kerbalan, tiroz, manifestariak Irango kontsulatuan sartzen saiatu zirenean.

Abdelmahdik protestak amaitzeko eskatu zuen herenegun: «Hilabete pasatu da eskolak, unibertsitateak eta bizitza publikoaren zati handi bat paralizatu zenetik. Garaia da Irakeko jarduna ohiko bidera itzultzeko». Ohartarazi zuen istiluek «ondorio lazgarriak» izan ditzaketela herritarrentzat epe luzera. Izan ere, haren arabera, Irakek dagoeneko arazoak ditu atzerritik datozen produktuen horniduran. «Normaltasunera» itzultzeko prozesu hori protestekin bateragarri dela gehitu zuen, betiere «legezko moduan» egiten badira, eta azpimarratu zuen entzun duela herritarren mezua: «Berrikuntzak egin eta ezartzeko balio digu plazetatik datorren ahotsak; herritarrak dira erreformaren oinarria, protesta modu egokian egiten badute bederen». Horretaz gain, iragarri zuen hilabete osoan hainbat hiritan ezarri dituen etxeratze aginduen ordutegiak murriztuko dituela.

Agintari berria

Abdelmahdik ez darama urtebete ere karguan, eta azken asteetan dimititzeko aukera aztertuko zuela esan arren, lehen ministro izaten jarraitzen du. Barham Saleh Irakeko presidentea, berriz, bozak aurreratzearen alde azaldu zen lehengo astean, eta gehitu zuen lehen ministroa dimititzeko prest zegoela.

Atzo, berriz ere milaka pertsona bildu ziren Bagdaden; hilen albisteek eguneroko kontua izaten jarraitzen badute, ez da erraza izango giroa lasaitzea. Manifestariek egunak daramatzate hiriburuko Jumhuriya zubia zeharkatu nahian. Zubi hori da Gune Berderako sarbidea, erakunde publikoen eta ordezkari diplomatikoen egoitzen kokalekua, hain uzen ere.

2003ko martxoan, AEBek Irak inbaditu zuten, eta, Saddam Hussein 1979tik herrialdeko presidentea zena boteretik kendu zutenetik, ezegonkortasun kroniko batean bizi dira Iraken. Garai hartan ezarritako eredu konfesionalari egozten diote hainbat manifestarik azken urteetako ustelkeria sistematikoa. Horri gehitu behar zaio 2014tik 2017ra Irak gerran egon zela EI Estatu Islamikoarekin. Iranen babesa zuten miliziak garrantzitsuak izan ziren EI Iraketik kanporatzeko, baina gobernuan botere handia izatera heldu ziren, eta orain ere herrialdeko protesten aurka dabiltza. Irakeko statu quo-ari eusteko interesa du Iranek.

Herbehereen aitortza

Herbehereetako Gobernuak atzo onartu zuen 2015ean Iraken eginiko aire eraso batean izan zuen ardura. Bonbardaketan 70 lagun hil ziren , eta zibilak ziren hainbat biktima. Operazioaren helburua EIren fabrika bat zen, Kirkuk eskualdean kokatua. Ank Bijleveld Defentsa ministroaren arabera, «erasoaren aurretik ez zirudien zibilei eragiteko arriskurik zegoenik, baina ondoren sortutako hainbat leherketak kalte handiagoak eragin zituzten».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

 ©Berria

Koronabirusaren azken datuak

Berria

Euskal Herrian 12.066 gaixok eman dute positibo koronabirusaren proba eginda. 737 hil dira. COVID-19 gaitza izandako 3.948 pertsonari eman diete alta. Grafikoak, albiste barruan.

Pertsona bat zebrabidea gurutzatzen, Iruñean. ©Iñigo Uriz / Foku

Alokairu turistikoak, debekatuta Lapurdiko kostaldean

Berria

Munduan 70.000 lagun inguru hil dira COVID-19 eritasunaren eraginez, eta atzemandako kasuak ia 1,3 milioi dira; joan den ostegunean, milioi bat ziren. AEBak eta, bereziki, New York dira pandemiaren epizentro berria. AEBetan, 337.000 positibo baino gehiago baieztatu dira, eta 9.600 lagun hil.. 

Irrintzi konpartsako erraldoiak, Boiseko Basque Blocken, 2015eko Jaialdian ©Urtzi Urrutikoetxea

Diasporako euskal jairik handiena bertan behera utzi dute

Edu Lartzanguren

Boiseko Jaialdi festibala bost urtetik behin egiten dute, eta aurtengo uztailerako zegoen programatuta. Azkenean, 2021eko uztailaren 27tik abuztuaren 1era egitea erabaki dute, "ardurak eraginda".

EGA Euskararen Gaitasun Agiria lortzeko probak. ©Andoni Canellada / Foku

Jaurlaritzak udazkenera arte atzeratuko ditu hizkuntza maila egiaztatzeko probak

Jon O. Urain

Indarrik gabe utzi du maiatzaren 9rako aurreikusitako proba idatzia, eta urrian egingo du. Onartutako eskabideak kontuan hartuko dira bigarren deialdi horretarako.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna