Albistea entzun

Frantziako Tourra

Distira egin du Hautacamen

Jonas Vingegaard liderrak irabazi du Frantziako Tourreko hemezortzigarren etapa. Hegan egin du azkeneko mendatean, eta atzean utzi du Tadej Pogacar. Orain, 3.26rena da bien arteko aldea
Jonas Vingegaard, Hautacamgo helmugan garaipena ospatzen, atzo, Frantziako Tourreko hemezortzigarren etapan.
Jonas Vingegaard, Hautacamgo helmugan garaipena ospatzen, atzo, Frantziako Tourreko hemezortzigarren etapan. YOAN VALAT / EFE Tamaina handiagoan ikusi

Beñat Mujika Telleria -

2022ko uztailak 22

Erakustaldia eman zuen atzo Jonas Vingegaardek (Jumbo-Visma) Frantziako Tourra biribiltzeko. Granonen maillot horia lehenengoz jantzi zuen modu berean atera zion distira, Hautacamen. Tadej Pogacarrekin (UAE) duen aldea handitzeaz gain, nagusitasuna erakutsi du danimarkarrak azken astean, eta ez da aldendu esloveniarraren gurpiletik.

Txirrindularitza omendu dute Vingegaardek eta Pogacarrek. Aspaldiko txirrindularitza erasokorra erakusteaz gain, elkarren arteko harremana bikaina izan da une oro. Egunero besarkatu dute elkar helmuga gurutzatu eta gero, eta, atzo ere, eredu izan ziren. Aldapan behera erasoa jotzen ari zela irristatu, eta erori egin zen Pogacar. Vingegaarden erantzuna bikaina izan zen. Aurrera abiatu ordez, atzera begiratu, eta itxaron egin zion esloveniarrari. Eskua eman zioten elkarri, eta onenen arteko lehiak nolakoa behar duen erakutsi zuten.

Lasterketa eroa eta bizia izan zen hasiera-hasieratik. Hainbat txirrindulari saiatu ziren eguneko ihesaldian sartzen, baina tropela zorrotz aritu zen, aldea handitzen utzi gabe. Aubisquera (16,4 kilometro eta %7,1eko pendiza) iritsi aurretik, 30 bat txirrindulari zituen taldetxoak multzo nagusiari aurre hartzea lortu zuen. Tropelak bide eman zion azkenerako mugimendu horri, eta hiru minutu baino gehiagoren aldearekin iritsi ziren Aubisque gainera.

Jaitsiera sigi-sagatsua egin zuten ondoren ziklistek, Spandelleseko (10,3 km, %8,3) aurreneko aldapetara iritsi aurretik. Mendate hori aurrenekoz igo zuten atzo Frantziako Tourrean, eta txirrindulariek erakustaldia eman zuten hango zoru lakarrean. Aurrealdean, hiru txirrindulari bakarrik gelditu ziren: Wout van Aert (Jumbo-Visma), Daniel Felipe Martinez (Ineos) eta Thibaut Pinot (FDJ). Tropelean, berriz, azpi-azpitik Brandon Mcnultyk (UAE) ezarri zuen erritmoa, Pogacarren mesedetan.

Pogacarrek berehala jo zuen erasoa, helmugarako 39 kilometro gelditzen zirenean, eta, orain arte bezala, Vingegaard haren gurpilean joan zen. Sepp Kuss liderraren taldekidea bikotearen ondora iritsi zen, eta Pogacarrek hanka altxatu zuen. Hala ere, beste hamaika aldiz saiatu zen mendate berean esloveniarra, baina ez zuen liderra gurpiletik atera ere egin. Sendotasuna erakutsi zuen une oro maillot horiak, eta eserlekutik altxatu gabe erantzun zien Pogacarren eraso bortitzei. Aurreko hirukotea, berriz, Spandelleseko tontorrera iritsi zen, eta bi oilarrak minutu eta erdira heldu ziren.

Pogacar aldapan behera ere saiatu zen, eta jarrera bikaina erakutsi zuen esloveniarrak. Vingegaard ia erori egin zen arren, eutsi egin zion, eta Pogacar bera izan zen aurrerago erori zena. Kuss eta Tiesj Benoot —liderraren taldekideak— eta Geraint Thomas (Ineos) batu zitzaizkien mendatea hasi aurretik, eta elkarrekin egin zuten Hautacamerako bidea.

Aurrean, Pinot izan zen Hautacam handian (13,6 km, %7,8) gora lehen mugimendua egin zuen txirrindularia, baina beste biek ondo erantzun zioten. Van Aertek jo zuen gero, aldapa hain pikoa ez zenean, eta Pinot atzean gelditu zen. Flandriarra eta kolonbiarra bakarrik geratu ziren aurrean zortzi kilometro gelditzen zirenean, baina oilarrak gain-gainean zeuzkaten ordurako, hegan egiteko zain. Kussek ezarri zuen erritmoa, eta haren gurpilean aritu ziren sailkapeneko lehenengo biak.

Helmugarako bost kilometro falta zirenean, hirukoteak lasterketa burua harrapatu zuen, eta bi oilarrak eta Van Aert gelditu ziren aurrean. Flandriarrak erritmo zitala ezarri zuen, eta Pogacar bera ere leherrarazi zuen. Maillot horia bakarrik gelditu zen orduan, eta bere aurtengo Tourra biribildu zuen, nagusitu egin baitzen mendiko azkeneko etapan. Bakarrik iritsi zen helmugara, eta bigarren etapa garaipena lortu zuen. Pogacarrek minutu bat pasatxo galdu zuen helmugan, eta, bihar azken erlojupekoa jokatu aurretik, Vingegaard liderrak ia erabakita utzi zuen Tourra. 3.26rena da bien arteko aldea orain.

Euskal herritar bat gutxiago

Imanol Erbiti (Movistar) ez da izango Parisko helmugan. COVID-19an positibo eman, eta etxera joan zen nafarra. Hamalaugarrenez ari zen Tourrean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

«Mendian arriskua kudea dezakezu, baina ezin duzu desagerrarazi»

Jon Artano Izeta

Mendi gidaria da, eta gidarigaien irakaslea. 30 urte daramatza Huarazen, Peruko Mendikate Zurian, eta ezagun du. 'Pucha', 'cachuelo', 'chibolo'... Ande-kontrako gaztelaniaren hitzak darabiltza, eta hango airea ere badu haren jardunak: 'empesar', ahoskatzen du, 'haser'... «Euskalperutarra» dela dio; herrialdeko mendigoizalerik onena dela esan izan dute hangoek.
Gai dela berretsi du

Gai dela berretsi du

Jon Ander De la Hoz

Julen Alberdi 'Txikia IV.a'-k estreinakoz irabazi du Urrezko Kopa, Iker Vicenteri eta Mikel Larrañagari aurrea hartuta: «Lan exijentea izan zen».

Nacho Monreal jokalaria, 2021eko irudi batean. ©Javier Etxezarreta, EFE

Nacho Monrealek futbola utziko du

Uxue Rey Gorraiz

«Garai bat bukatu da. Beste bat hasi. Zoriontsu naiz», azaldu du futbolari nafarrak sare sozialetan zabaldutako mezu batean. Hamasei urte egin ditu futbol profesionalean; Osasunan eta Realean horietako hainbat.

 ©NADETH AGIRRE

«Gure arraun egiteko erari eustea izan da arrakastaren gakoa»

Julen Etxeberria

Oriok hirugarrenez irabazi du Euskotren liga, baita Nadeth Agirrek ere. Baina gehiago nahi dute. «Zarautzen irabazi nahi dugu, lana biribiltzeko. Gero, Kontxan nagusitu nahi dugu».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Beñat Mujika Telleria

Informazio osagarria

Iruzkinak kargatzen...