Alarma faltsua besterik ez

Primoz Roglicek (Jumbo) ahulaldia izan zuen asteartean, Bondonen gora. Joka hasi zitzaion alarma, eta zarata handitu egin zen atzo, lehen igoeran atzera eginda ibili zenean. Mendiko beste etapa gogor bat zuen Giroak, eta esloveniarra zalantzak hauspotzen ari zen. Ordea, haizatu egin zituen gero: erasora jo zuen amaieran, eta Giroa irabazteko beste bi hautagai handien pare dagoela erakutsi zuen. Geraint Thomasek (Ineos) tinko eutsi zion Roglicen astinduari eta, ondorioz, lasterketako lidergoari. Joao Almeida (UAE), berriz, ez zen Bondonen etapa irabazi zuen berbera izan, eta larri ibili zen. 21 segundoko atzerapena izan zuen helmugan bi aurkariekin, eta, hala, nagusiko bigarren postua kendu zion Roglicek. Jumbokoak 29 segundora du Thomas, eta Almeidak, 39ra .

Oilarrak helmugaratu aurretik, iheslari saiatu batek altxatu zituen besoak Val di Zoldon: Filippo Zanak (Jayco). Lehia estua izan zuen Thibaut Pinotekin (Groupama), eta esprintean menperatu zuen. Berriz ere kale egin zuen frantziarrak, baina bere egin zuen mendiko maillota, eta jauzi handia egin zuen sailkapenean: zazpigarren jarri zen.

Mendi sorta ederra zuen etapak: bost igoera gainditu behar izan zituzten, azken hirurak oso segidan. Nolanahi ere, lauak ziren aurreneko 30 kilometroak, lehen mailako Passo della Crosetta igotzen hasi aurretik. Asko saiatu ziren malden zain egon gabe aurrera egiten. Erasoari erasoa lotu zioten iheslarigaiek, eta elkar deuseztatu zuten. Aldapan gora, baina, bost txirrindulari ipurtarin aitzineratu ziren: Zana, Pinot, Aurelien Paret-Peintre (Ag2r), eta Derek Gee eta Marco Frigo (Israel). «Hauekin berriz ere?», esango zuten bere artean.

Gain-gainean zuten tropela gailurrean, Ineosek erritmo bizia ipini baitzuen. Baretu egin ziren gero Thomasen zaindariak, eta tartea handitzen hasi zen boskotea. Zazpikote bihurtu zen berandu gabe: atzetik aurrera egin zuten Warren Barguilek (Arkea) eta Vadim Pronskiyk (Astana). Pinotek 6.48ko atzerapena zuen sailkapen nagusian, baina faboritoek ez zuten mehatxutzat jo. Bidea eginez joan zen ihesaldia, eta ia sei minuturen aldearekin iritsi zen Forcella Cibianako igoerara, helmugarako 35 kilometro falta zirela. Soka bere aldera ari zen eramaten.

UAEko ziklistek saialdi herabea egin zuten abiada bizitzeko. Gutxi iraun zien grinak. Azkenean, Ineosek egin zuen estutua, mendateko zatirik gogorrenean. Xehatua hartu zuen multzoak. Coi zen hurrengo mendatea, eta han egin zuen eztanda lasterketak, azken hamar kilometroetan sartuta. Ihesaldian, aurkari guztiak lehertu zituzten Pinotek eta Zanak; eta onenen artean, erasora jo zuen Jumbok. Sepp Kussek soka tenkatu ahala, atzera egin zuen Almeidak. Distantziari ondo eutsi zion, Jay Vineren laguntzaz.

Guztiz indarberrituta zegoen Roglic. Eraso egin zuen, baina ezin izan zuen Thomas gurpiletik askatu. Almeidak hamar segundo inguru zituen galduak mendate gainean. Ordea, bakarrik gelditu zen azken igoeran, indarrez hustu baitzen Vine, eta tartea apur bat handitu zuten Roglicek eta Thomasek. Dena den, alde txikiak izan ziren berriro hautagai handien artean. Etapa garaipenaren lehia ere oso parekatua izan zen: Pinotek ahaleginak eta bi egin zituen Zana atzean uzteko, baina oso sendo jardun zuen italiarrak, eta azkarragoa izan zen azken ahaleginean.

Mendietan barrena berriz

Hiru faborito handietako edonork irabaz dezake oraindik Giroa. Ezusteko handirik ezean, ez da beste inor izango lehia horretan. Atzo, berriz ere, Eddie Dunbar (Jayco) izan zen gainontzeko faboritoetan onena, 36 segundo galduta, eta laugarren jarri zen sailkapen nagusian, 3.39ra. Damiano Carusok (Bahrain) postu bat egin zuen atzera, eta bosgarren da orain, 3.51ra.

Giro honetako mendiko etapa nagusia jokatuko da gaur. Longaronen hasi eta Tre Cime di Lavaredon bukatuko da, 183 kilometroan bost mendate kateatu eta 5.400 metroko desnibela gainditu ondoren. Txirrindulariek gorantz egin beharko dute pixkanaka, Passo Campollongora iritsi arte. Gero, lehen mailako bi mendate kateatuko dituzte: Valparola eta Giau. Tre Croci igoko dute hurrena, eta amaieran, Tre Cime di Lavaredo, lehen mailakoa. Gogortasun handikoak dira azkeneko lau kilometroak, baina, bukaeraren zain egon gabe, urrutitik lasterketa apurtzen saiatuko da bat baino gehiago.