Noiz sortua: 2020-06-03 00:30:00

Ez du urrun begiratzen

Gaizka Garitanok ontzat eman du Athleticekin adostutako urtebeteko kontratua. Falta diren 11 jardunaldietarako, Europarako sailkatzea jarri du helburu
Gaizka Garitano Athleticekio entrenatzailea, atzo, bere kontratua berritzearen inguruan egindako agerraldian.
Gaizka Garitano Athleticekio entrenatzailea, atzo, bere kontratua berritzearen inguruan egindako agerraldian. ATHLETIC Tamaina handiagoan ikusi

Haritz Gallasegi -

2020ko ekainak 3

Gaizka Garitano Athleticeko entrenatzaileak argi dauka: egungo futbolean alferrikako lana da epe luzerako asmoak izatea. Entrenatzaileek denbora eta agintarien konfiantza behar dute esku artean duten proiektuari onena ateratzeko. Baina pazientzia eta futbola uztartzea ia ezinezkoa da. Emaitzek agintzen dute: ez dago besterik. Haztegia zutabe duten klubetan ere bai. Horregatik, Garitanok epe laburreko helburuei ematen die garrantzia. Eguneroko lanak emango baitio proiektua luzatzeko aukera.

Bada, teknikariak eta Ibaiganeko nagusiek bat egin dute kontratua urtebetez luzatzeko adosteko orduan. Ondo hartu dute elkar. «Nik horrela funtzionatzen dut, eta klubak ere ondo ikusten du. Niretzat exijentzia da. Epe motzean emaitzak lortzea eskatzen dit. Taldeak maila ona eman behar du jarraitu ahal izateko. Bestalde, Athletici erraztasunak ematen dizkio entrenatzailea aldatzea erabakitzen badu. Ni hemengoa naiz, eta Athleticentzat ona dena niretzat ere ona da», esan zuen atzo Garitanok, liga eten eta kontratua berritu ostean egindako lehen agerraldian.

Entrenatzaile bizkaitarrak ereindakoa jaso du. Athleticen ardura hartu zuenetik, lan ona egin du. Taldea zuzentzeko ardura eman ziotenean, jaitsierako postuetan zegoen. Zulotik atera zuen, eta Europa ligarako sailkatzear egon zen. Sasoi honetan, berriz, Espainiako Kopako finalerako sailkatu da. Datorren astean ekingo zaio berriz lehiari, eta geratzen diren 11 jardunaldietan gehiago eskatuko die jokalariei. Epe laburreko hurrengo erronka datorren sasoian berriro ere Europan lehiatzea izango da. «Epe luzeko helburuak oso urruti ikusten ditut. Futbolak epe motzera begira funtzionatzen du. Hilabete pasatxoan zazpigarren postua lortzea da gure asmoa. Ez da erraza izango. Bost puntu atzetik goaz, eta partida zailak ditugu. Hala ere, argi daukagu helburua Europa dela».

Inoiz ezagutu ez duen egoera batean dago futbola. Denboraldia bi zatitan banatu du pandemiak. Etenaldia gutxi ez, eta lehiaketara itzuli ahal izateko egin beharreko urratsak bereziak izan dira oso. Hasteko, etxean bakarka entrenatzeari utzi eta klubaren instalazioetan talde txikietan entrenatzen hasi ziren. Eta, bigarrenez, bi aste eskas dituzte ohiko lan saioak egiteko. Dena da berria. Horregatik, protagonistek ez dakite nola erantzungo duten lehiatzea tokatzen zaienean. Galdera gehiago dituzte erantzunak baino. Hori bai, argi dute egoera berriari neurria hartzen ez dioten taldeek ordaindu egingo dutela. «Ez dakigu nola dagoen taldea. Sentsazioak oso onak dira. Oso ondo ari gara entrenatzen. Arlo fisikoan indartsu ikusten ditut jokalariak. Baina ez daukagu erreferentziarik. Ez dugu lagunartekorik jokatu. Inork ez du 90 minutuko probarik egin. Ezin da jakin taldeek nola erantzungo duten», gaineratu zuen Garitanok.

Alemaniako Bundesligan jokatu diren lau jardunaldiak lagungarriak ari dira izaten datorrena hobetu ulertzeko. Hala ere, gauza bat da ikuskizuna telebistan ikustea, eta bestea futbol berriaren partaide izatea. «Ondoen egokitzen denak abantaila izango du. Harmailak hutsik egongo dira, bost aldaketa egiteko aukera izango dugu, bero egingo du… Baldintza berrietan lehiatzera ahalik eta azkarren moldatu behar dugu». Baina Garitano gehien arduratzen duena partida batetik bestera indarrak hartzeko izango duten denbora falta da. «Kezkatu egiten nau hiru egunetik behin jokatzeak. Erritmo handian jokatzen dugu, eta guk presioan oinarritzen dugu gure jokoa. Neke handia dakar horrek. Batzuetan, kalitate handiagoa duten taldeen kontra jokatzen dugu. Horrek guztiak gure jokoa baldintza dezake».

Harmailak hutsik daudela jokatzeak ere ondorioak izango dituela dirudi. Alemanian, kanpoko taldeak etxekoak baino emaitza hobeak lortzen ari dira. Athleticek sei partida jokatu beharko ditu San Mamesen, eta bost etxetik kanpo. Beraz, hasiera batean ez dio mesederik egingo jarraitzaile barik jokatzeak. «San Mamesek bultza egiten du. Zaleen falta igarriko dugu. Hala ere, ez da aitzakia izango. Lehiakorrak izan behar dugu». Bestalde, etxean gal dezakeena kanpoan irabazteko aukera izan dezake Athleticek. Izan ere, etxetik kanpo makal aritu da taldea txapelketaren lehen bi herenetan.

Kopa eta etorkizuna

Garitanok nahikoa lan dauka luze gabeko erronkei aurre egiteko. Baina, era berean, datorren sasoiari begira erabakiak hartu beharko ditu. Gauza batzuk ezin dira azken egunerako utzi. Ildo horretan, belaunaldi aldaketa dator talde zuri-gorrian. Aduriz erretiratu egingo da, eta ez dago argi San Josek eta Beñatek taldean jarraituko duten edo ez. «Oso ondo ari dira entrenatzen. Liga amaitzen denean ikusiko dugu. Jokalari oso onak dira biak, eta pertsona gisa ere bai». Hala ere, bi jokalariak jakinaren gainean daude aukera gutxi dutela talde zuri-gorrian jarraitzeko. Haien lekua hartuko dutenei gauzak argi utzi zizkien teknikari zuri-gorriak. «Belaunaldi aldaketa gauzatzen ari gara. Jokalari gazteei aukerak ematen ari gara. Bada, jokalari onak izateaz gain, klubak eskatzen duen jarrera erakutsi behar dute».

Espainiako Kopako finalaren gainean ere jardun zuen Garitanok. Atzeratzeko erabakia egokia dela uste du, nahiz eta gauzak gaizki joanez gero arriskua egon daitekeen bera aulkian ez egoteko. «Nahiago dut hori, finalean zelaia hutsik ikustea baino».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Osakidetzako langile bat Txagorritxuko laborategi batean lanean. ©Gorka Rubio, Foku

Justizia Auzitegi Nagusiak ebatzi du Osakidetzak arriskuan jarri dituela langileak

Ainhoa Larretxea Agirre - Mikel P. Ansa

Osagileen sindikatuek jarri zuten salaketa, eta ekainaren 16an egin zuten epaiketa. ESK sindikatuak Nekane Murga Osasun sailburuaren eta Osakidetzako zuzendaritzaren dimisioa eskatu du. Osakidetzak, ordea, «positibotzat» jo du ebazpena, epaileak atzera bota dituelako sindikatuen «eskari gehienak».

Jendea paseoan, konfinamendua arintzeko lehen fasean. ©JON URBE/ FOKU

Jaurlaritzak ziurtatu du COVID-19aren agerraldiak «kontrolatuta» daudela

Irati Urdalleta Lete

Beste hamalau positibo eta hiru hildako daude. Jaurlaritzak pentsatu du neurriak areagotuko dituela jende pilaketak «mantenduz eta orokortuz» gero

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna