Kaieren garrantzi erabatekoa

Realak eta Osasunak urteko lehenbiziko derbia jokatuko dute gaur, Anoetan. Talde txuri-urdinak sailkapeneko goiko postuetarako lehian segitu nahi du. Gorritxoak, berriz, zulotik urrundu nahi du
Realak eta Osasunak aurreko denboraldian Anoetan jokatutako derbia. Bana berdindu zuten.
Realak eta Osasunak aurreko denboraldian Anoetan jokatutako derbia. Bana berdindu zuten. JAVIER ETXEZARRETA / EFE Tamaina handiagoan ikusi

Jon Ander De la Hoz -

2021eko urtarrilak 3

Sailkapenak ez du zalantzarako tarterik uzten: orain arte egindakoei erreparatuz gero, Reala da gaur Osasunaren aurka jokatuko duen partida irabazteko hautagai nagusia. Donostiarrak lehendabiziko postuetan dira sasoia hasi zenetik, eta azken postuak utzi ezinik iruindarrak.

Neurketak badu beste aldagai bat, ordea: derbia da. Bi taldeek ondo ezagutzen dute elkar, eta bateko nahiz besteko jokalariek ondo dakite zeintzuk diren arerioaren indarguneak eta ahulguneak. Sailkapenak eman dezake partidaren nondik norakoen inguruko pistaren bat, baina ez bakarra; bestearekiko duten ezagutza kontuan, entrenatzaileen kaierek zeresan handia izango dute gaur. Sailkapenak baino handiagoa, seguruenera.

Imanol Alguacilek eta Jagoba Arrasatek ondo ezagutzen dute elkar. Haien taldeak nor baino nor gehiago ariko dira 17. jardunaldian, eta ezagutza horren garrantziaz mintzatu zen atzo Arrasate, prentsaren aurreko agerraldian: «Badugu elkarren berri. Iaz partida dezente jokatu genituen. Bat aukeratzekotan, azkenengoa hautatuko nuke. Ondo aritu ginen Anoetan, eta irabazteko aukera ere izan genuen».

Orduan gertatutakoak (1-1) badu gaurkoaren trazarik. Pandemiak behartutako etenaren ondotik jokatutako lehendabiziko partida izan zen, eta Reala Txapeldunen Ligan sartzeko lehian zen oraindik. Osasunak puntu bat urratu zuen Anoetan, eta, bestelako egoera batean bazegoen ere, erakutsi zuen balantzak zelaian egiten duela alde batera edo bestera, eta ez handik kanpo.

Halakoxe ustea du Imanolek ere. Gipuzkoarren prestatzaileak ere uste du gorritxoek gorago egon beharko luketela: «Presioari dagokionez oso talde oldarkorra da. Gai da 90 minutuz aurkaria bere zelaian estutzeko, eta asko gerturatzen da kontrarioaren areara. Puntuak eskuratzea kosta egin zaio, baina ondo lehiatzen da. Eskuratu dituen baino puntu gehiago merezi ditu».

Arrasatek ere badu Realaren jokatzeko moduaren berri, atzo ageriko utzi zuenez: «Posizioko jokoan ekimena izan ohi du, eta hor estutu egin behar ditugu, eroso egon ez daitezen. Gero, erasoan min egin behar diegu, eta ezustean harrapatu. Aurkariaren zelai zatian aritzea komeni da, bestela ez baitugu izango albiste onik».

Hutsune esanguratsuak

Bi taldeek zenbait jokalariren hutsunea izango dute zelaian. Realak joan zen ostegunean izandako jokalari denak prest ditu, baina David Silva, Aritz Elustondo, Adnan Januzaj eta Joseba Zaldua ez dira ariko. Aldiz, Arrasaterentzat esangura handiko jokalariak diren Oier Sanjurjok eta Darko Brasanacek ez dute Donostiara bidaiatuko, ezta Ruben Martinez atezainak ere. Hutsuneak hutsune, Imanol eta Arrasate ez dira arerioez fio: «Iaz baino talde osoagoa du Realak», esan zuen Berriatukoak. Imanolek, berriz, hau esan zuen: «Osasuna asko gerturatzen da aurkariaren areara». Elkar zelatatzearen ondorioak dira.

REALA-OSASUNA
Reala. Remiro; Gorosabel, Zubeldia, Le Normand, Monreal; Merino, Guridi, Zubimendi; Portu, Willian Jose eta Oiartzabal.
Osasuna. Sergio Herrera; Roncaglia, Aridane, David Garcia, Iñigo Perez; Moncayola, Roberto Torres, Barja; Calleri, Budimir eta Enric Gallego.
Epailea. Pizarro Gomez.
Lekua. Anoeta.
Ordua. 18:30ean (Movistar La Liga).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Ander Gebara eta Jon Bautista, jota, zelai erditik ateratzeko prest, Betisek binakoa sartu berritan. ©GORKA RUBIO / FOKU

Lehendik ikusitakoa da

Jon Ander De la Hoz

Reala 2-0 jarri da aurretik, baina ez da gai izan irabazteko, eta Betisek aprobetxatu egin du partidaren azken txanpan bi gol sartu eta berdintzeko
Nahikari Garcia eta Sheila Elorza, aurrez aurre, atzo, Unben. ©GORKA RUBIO / FOKU

Merezitako puntu banaketa

Iñigo Lasa

Eibarrek eta Realak berdindu egin dute Unben. Lau goletatik hiru partidako azkeneko hamar minutuetan izan dira
Joseba Ezkurdia, pilota jotzear, Iraitz Zubizarreta begira duela, atzo, Beotibarren. ©JON URBE / FOKU

Aurrenekoa irabazita, lasaitua

Julen Etxeberria

Ezkurdia-Galarzak lehen garaipena lortu dute, Zubizarreta III.a-Albisu 22-14 mendean hartuta
Eibarren eta Realaren arteko gaurko partida. ©@RealSociedadFEM

Merezitako berdinketa Gipuzkoako derbian

Iñigo Lasa

Bina amaitu da Realaren eta Eibarren arteko derbia. Lau goletatik hiru partidako azkeneko hamar minutuetan sartu dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.