Lagundu

«Nola lagundu dezaket?», galderarekin hasten da New Amsterdam telesailaren lehen kapitulua. Laguntza eskaintzeko modu asko daude: lagunei, familiari edo lankideei egunero eskaintzen diegu laguntza. Eskaintzeaz gain, eskatu ere egiten dugu. Zutabearen bitartez, pantailan zer ikusi erabakitzen ari garen une horretarako laguntza eskaini dut askotan. Plataformetan telesail bat aukeratzeko zailtasunak izaten dira batzuetan, eta arazo horrekin laguntzen saiatu naiz.

Telesail berriak ikusten ditudan bitartean, aspalditik nirekin dauden telesail batzuei agur esaten ari naiz azken boladan. 2023. urtea The Good Fight telesailaren amaiera ikusten hasi nuen. Aspalditik bazterrean utzia nuen Brooklyn Nine-Nine telesailaren azken denboraldia ikusi dut duela gutxi, eta aipatu dudan New Amsterdam telesailaren azken kapitulua aurreko astean ikusi nuen. Hiru telesail horiek hutsune handia utziko didate pantaila txikiaren aurrean, baina, hiru telesailen azken kapituluak ikustean, galdera berbera etorri zait burura: «Nola erabakitzen dute gidoigileek telesail baten amaiera?». Aipatu ditudan hiru telesailek amaiera bikainak izan dituzte, baina niretzat onena New Amsterdam telesailarena izan da. Amaiera borobila izan du eta telesailaren hasierarekin lotura handia du. Hasieraren elementu ia guztiak ditu amaierak, baina urte asko pasatu dira hasieratik amaierara, eta amaieraren protagonista ezusteko aparta da.

Telesail luze bati amaiera on bat emateko ideia asko bururatzen zaizkit, baina argi dut telesailaren jarraitzaileen gustukoa izateko ezaugarri oinarrizkoak behar direla: telesailaren protagonisten istorioak ondo itxi behar dira, eta ahal bada, telesailean agertu diren protagonista ia gehienek agertu behar dute. Azken hori Brooklyn Nine-Nine telesailean aurkitzen dugu. Protagonisten artean erronka bat dute urtero, eta, azken denboraldia ixteko, azken erronka antolatzen dute, guztien gozamenerako. Bertan, telesailean aspaldi agertzen ez diren pertsonaiak ere agertu dira.

Amaiera bikain horien ostean geratu zaidan sentsazioa arraroa da, eta gauza berriak aukeratzeko laguntza behar dut. Plataformen bilatzailean galduta egon beharrean, nahiago nuke norbaitek «nola lagundu dezaket?» galdera niri egitea.