Albistea entzun

EKOGRAFIAK

Doraemon

Amaia Garcia -

2021eko azaroak 30

Nire gurasoak ez dira euskaldunak, baina euskara ikas nezan, amak ETB1en goizean emititzen zituzten marrazki bizidunak VHSko zinta batean grabatzen zituen haurtzaindegian nengoen bitartean, eta bertatik itzultzen nintzenean ikusten nituen. Eskolan irakasle askok nire ama zoriondu zuten hori egiteagatik, eta askotan eskertu diot egin zuen esfortzuarengatik. Handitu nintzen arte, euskarazko bikoizketa zuten marrazki bizidun asko ikusten nituen eta askotan Euskal Herritik kanpoko lagunekin oso arraroa egiten zait Dragoi Bola, Doraemon edota Sakura bezalako animazioen inguruan hitz egitea. Haien bertsioak gazteleraz edo katalanez izan ziren, eta bitxia egiten zaigu marrazki horien abestien bertsio desberdinak alderatzea.

Aurreko astean, ETB3 Nafarroa osoan ikusteko aukera egongo dela adostu zuten EH Bilduk eta Espainiako Gobernuak. Horrek polemika sortu du Espainiako eskubiko alderdi politiko askotan, UPNn ere bai. Haientzat, Nafarroako umeek marrazki bizidunak euskaraz ikusteko aukera hori ez da ona, eta beldurra dute. Ez nago ziur zeri dioten beldur, agian ume elebidunek dituzten abantailen aurka daude edo euskaldun izatea terrorismoarekin lotu nahi dute berriro ere.

Madrilgo erkidegoko presidente Diaz Ayuso arduratuta dago horrekin ere. Duela hilabete batzuk gaztelaniaren bulegoa sortu zuen, dirudienez hizkuntza hegemoniko hori arriskuan omen dagoelako. ETB3ren albistea jakitean, bere ardura adierazi zuen prentsaren aurrean, eta Diaz Ayusok euskara telebistaren bitartez inposatuko dela salatu du. Horrek gizartea banatzea ekarriko duela esan du politikari madrildarrak. Euskara ezagutzen ez duten politikariak izan dira neurria kritikatu dutenak. Aldiz, euskaldunon artean albistea aurrerapauso txiki gisa ikusi dugu, Lander Arretxeak bere aurreko zutabean azaltzen zuen bezala.

Eta bitartean, Nafarroako ume guztiek marrazki bizidunak euskaraz ikusteko aukera izango dute. Batzuek aukera hori aprobetxatuko dute eta beste batzuek Disney Plus edo beste plataformetan ikusten dituzten marrazki bizidunak ikusten jarraituko dute. Euskara ikasteko modu anitz daude eta bakoitzak berea aurkituko du. Nirea marrazki bizidunak izan ziren, beraz: Gora eta gora beti, Doraemon!

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JON URBE / @FOKU

«Askotan, baimena eskatzea baino hobe da barkamena eskatzea»

Naroa Torralba Rodriguez

Munduko muralik onenetan hirugarrena Ondarroan dago, Kamiñazpin. Lian Monserrate da egilea, eta gaztetatik ari da gizarte gaiak hormetara eramaten. Memoria ariketa bat egin nahi izan du obra horrekin.
 ©ENDIKA PORTILLO / FOKU

«Garbitzailea ezinbestekoa da ospitale batek ondo funtzionatu dezan»

Unai Etxenausia

Urte luzeak eman zituen Lorenzok Gasteizko Santiago ospitaleko gela guztiak garbitzen. «Lan gogorra» izan arren, goxo oroitzen ditu korridore horietan bere lankideekin batera pasatutako orduak eta haiengandik jasotako tratua.

1 ©LABAYRU FUNDAZIOA / EZEZAGUNA

Itsasoko ezkutuko lana

Amaia Jimenez Larrea

Emakumeek itsasoan egindako lanaren balioa aldarrikatzeko, Labayru fundazioak 'Geu be bagara itsasoa' liburua argitaratu du. Zenbait belaunalditako hogei emakumeren testigantzak bildu dituzte.

<em>Te falta un Teleberri</em> saio berria. ©ETB

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.