Urrutira iristeko bi hautagai

Zozketak hala erabakita, atariko kanporaketetatik abiatzea egokitu zaie Azkoitiari eta Markinari XVIII. Berria Txapelketan, baina erakutsi dute urrutira iristeko moduko taldeak dituztela. Hain zuzen, azkoitiarrek oso sendo jokatuta gainditu zuten etxean Iurretako Olaburu joan den ostiralean, eta markinarrek are sendoago menderatu zuten Zestoako Abantzu, igande arratsaldez. Hortaz, garaileen izenak kontuan hartzekoak izango dira aurrerantzean. Izan ere, aise iritsi dira final-hamaseirenetara.

IURRETA
Olaburu (Iurreta) 1
Azkoitia 2

Kanporaketa estua espero zen Olabururen eta Azkoitiaren artean, baina, bizkaitarrek etxean jokatu behar zutenez, faborito izaerarekin haiek kantxaratu ziren. Ordea, ez zuten asmatu aldetxo hori baliatzen. Oso interesgarri joan zen kadeteen arteko lehia. Interesgarri eta estu. Hasieratik aurrea hartu zuen Arregi eta Galartza Azkoitiko bikoteak: 4-8 eta 10-15. Atzelaria nagusi zen piloteoan, eta aurreko koadroetan ere lan duina egiten ari zen Arregi. Dena den, behetik gora egin zuten San Anton eta Atutxa bizkaitarrek, eta ederki estutu zituzten kontuak. Lanean oinarrituta, 19-20 hurbildu ziren, baina azkenean Azkoitiak lortu zuen puntua: 19-22.

Gidoiak kontrako norabidea hartu zuen gazteen arteko norgehiagokan. Serio eta langile jokatuta, erabat aurretik ibili ziren Bikandi eta Aldea iurretarrak (8-3 eta 15-7), eta bazirudien poltsikoan zutela berdinketaren puntua. Ordea, euren akatsek sartu zuten partidan Azkoitiko bikotea, Etxaniz eta Egañak osatua. Aparteko beharrik gabe, bere onetik atera zen Bikandi, eta garesti ordaintzetik gertu egon ziren. Halere, azkenean etxean geratu zen puntua (22-17).

Hortaz, nagusien esku geratu zen guztia, eta partida horretan ez zen kolorerik izan. Inunziaga eta Romero iurretarrek soilik bi tanto egin zituzten Oteiza eta Azkoitiaren kontra. Aurrelari azkoitiarrak nahierara jokatu zuen. Gauzak hala, Azkoitiak Logroñoko Titin III.a elkartea izango du aurkari final-hamaseirenetan.

HERNANI
Markina 3
Abantzu (Zestoa) 0

Aurtengo txapelketan orain arte inork eman gabeko talde erakustaldia eskaini zuen Markinak igande arratsaldez, Hernaniko pilotalekuan. Hiru partidetan jaun eta jabe izan ziren, eta oso pilotari interesgarriak kantxaratu zituen, gainera. Kadeteen arteko norgehiagoka izan zen jaialdiko interesgarriena. Zearra eta Ibarzabal markinarrek 22-8 irabazi zieten Uria eta Alonso zestoarrei, baina emaitzak ageri duena baino lehia estuagoa izan zen. Atzeko koadroetan nagusi izan zen Ibarzabal, baina aurrean tanto ikusgarriak egin zituzten biek. Tanto asko estuak izan ziren, baina garaipen erosoa eskuratu zuten bizkaitarrek.

Gazteen artekoan aparteko aldea egon zen bi bikoteen artean. Gaur-gaurkoz, beste maila batekoak direla ikusi zen, Markinako Alvarez eta Calvok 22-1 irabazi baitzieten Zestoako Lizarralde eta Agirreri. Hala, kontuak ongi erabakita zeuden nagusien partida hasterako, baina han ere oso puntu erosoa eskuratu zuten bizkaitarrek. Agirreamalloak eta Pujanak 22-4 menderatu zituzten Sasiain eta Alonso. Markinako aurrelariaren distira izan zen nabarmentzekoa.

Final-hamaseirenetako kanporaketan Najerino elkartearen aurka neurtuko ditu indarrak Markinak.