Albistea entzun

«Exijentzia handiko garai bat dugu zain»

Roberto Olabek Realaren sasoiko helburuak aletu ditu, eta esan du partida kopuru handiari aurre egitea gakoa izango dela: «Lana dugu».
Roberto Olabe Realeko futbol zuzendaria, atzo, hedabideen aurrean azalpenak ematen.
Roberto Olabe Realeko futbol zuzendaria, atzo, hedabideen aurrean azalpenak ematen. REALA Tamaina handiagoan ikusi

Jon Ander De la Hoz -

2021eko irailak 2 - Donostia

Ordu eta erdiko hitz-aspertuak askorako eman dezake, eta zer esanik ez hizlarietako bat Roberto Olabe bada. Realeko futbol zuzendariak lantzean behin kazetariekin biltzeko ohitura du, eta data seinalatuak aprobetxatzen ditu horretarako. Sasoia amaitu eta hurrengo egunetan bildu zen orain baino lehen. Atzo, berriz deitu zituen kazetariak, udako merkatua itxi eta biharamunean.

Horixe izan zuen hizpideetako bat. Hasieran, taldearen egituraz mintzatu zen, hasi berri den sasoirako aurreikusten duenaz: «Exijentzia handiko garai bat dator», esan zuen teknikari gasteiztarrak. Horretarako ekarri dituzte Matthew Ryan, Diego Rico eta Alexander Sorloth: «Ezagutza ezinbestekoa da hartu-emanei ekiteko garaian», esan zuen Olabek. Hala azaldu zuen Sorloth hain azkar fitxatu izana.

Hiru jokalari horiek izan dira Realaren fitxaketa nagusiak. Natxo Monrealen eta Carlos Fernandezen lesioek bultzatu dituzte mandatariak ahalik eta ondoen fitxatzera: «Edo formatu, edo firmatu», adierazi zuen Olabek.

Agerraldirako atondutako areto batean, eskema batzuk erakutsi zituzten, pantaila batean. Han agertzen ziren Realeko gizonezkoen eta emakumezkoen talde nagusienetan ari diren jokalari guzti-guztiak. Harrobikoak eta kanpotik ekarritakoak. Zubietako harrobian ondutako jokalari kopurua izugarri handia da.

Alde horretatik, Olabek adierazi du gizonezkoen taldean «hiru dimentsioko begirada» batekin ari direla lanean, eta Realaren bigarren eta hirugarren taldeei egin zien erreferentzia: «Gure helburua ez da dauden maila horietan egotea; egoerak ekarri du hori, baina gustura gaude. Lan egiteko modu baten ondorioa da».

Realekoak dira Espainiako ligako Lehen eta Bigarren Mailan dauden talderik gazteenak. Talde nagusiak 25 urte eta 266 egun ditu batez beste; bigarren taldeak, 21 urte eta 113 egun: «Gure helburua ez da talderik gazteenak edukitzea. Gure jendearen ikuskerarekin bat egin nahi dugu, baina proiektu egonkor bat osatuta. Betiko kluba izatea nahi dugu, eta ahalik eta dimentsiorik handiena izatea». Lau P-tan laburbildu zuen klubeko kirol egituraren lan egiteko modua: planifikazioa, programa, pazientzia eta prozesua.

Lan karga zaintzea

«Neke handiko sasoia izango da», Olaberen esanetan. Realaren talde nagusiak hiru txapelketa jokatuko ditu: Espainiako liga, kopa, eta Europa liga. Haietan guztietan aritzeko, «talde nahiko laburra» dutela azaldu zuen; abian dagoen «metodologiarekin bat» egiten duen egitura dela zehaztu zuen. Partida asko izateak ekarriko duen lan karga arintzea izango da donostiarren asmoetako bat, bereziki, Mikel Oiartzabali dagokionez. Eibartarrak hilabeteak eman ditu etenik gabe jokatzen, eta asteon du lehendabiziko opor astea: «Kontziente gara Mikelek zenbateko zama duen. Tentuz aritu behar dugu harekin».

Arlo fisikoko beste kezka Asier Illarramendirekin dute. Mutrikuarrak «atseden beharra» zuela esan zuen Olabek sasoi amaierako bilkuran, eta, oporretatik itzuli eta berriz entrenatzen hasitakoan, lesioa izan zuen: «Konplikatua da, baina ez izan zalantzarik: Asier bera da ahalik eta lasterren prest egon nahi duen lehendabizikoa»,

Emakumezkoen taldeaz labur aritu zen Olabe. Adierazi zuen «belaunaldi aldaketak batzuetan nahi ez direnean» gertatzen direla, baina gazteak badatozela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Osasuna

Karolina Sarasua iraindu eta mehatxatu zuten gazteak identifikatu ditu Poliziak

Berria

Adin txikikoak dira guztiak, eta, beraz, Adin Txikikoen Fiskaltzaren eskuetan gelditu da jazoerari buruzko ikerketa.

Fernando Llorente, Eibarreki azterketa medikua pasatzen. ©SD EIBAR

Fernando Llorentek Eibarren jokatuko du

Julen Etxeberria

36 urteko aurrelaria talderik gabe zegoen, eta denboraldia amaitu arteko kontratua adostu du eibartarrekin. 

Rodrigo Salinas Bidasoako jokalaria, jaurtitzen, atzo. ©GORKA RUBIO / FOKU

Bidasoak lehen garaipena lortu du Europako Ligan

Berria

Irundarrek lehen zatian eginiko lanari esker irabazi diote Pfadi, Artalekun, ligaxkako bigarren jardunaldian: 32-28

Alaveseko jokalariak, partidako gol bakarra ospatzen, Mamadou Loumek sartutakoa. ©DAVID AGUILAR / EFE

Arnasaldi sakona

Eñaut Agirrebengoa

Alavesek bigarren garaipena kateatu du, Elxen aurka, Loumen gol bati esker. Jaitsieratik irten da behin-behinean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.