Albistea entzun

Villacampa ere, kalera

Athleticek kargutik kendu du entrenatzaile espainiarra, emaitza txarren ondorioz, eta Iraia Iturregik ordezkatuko du 2022ko ekainera arte
Angel Villacampa, herenegun, Zubietan, Realaren aurkako derbian. Azken aldiz zuzendu zuen Athletic.
Angel Villacampa, herenegun, Zubietan, Realaren aurkako derbian. Azken aldiz zuzendu zuen Athletic. JON URBE / FOKU Tamaina handiagoan ikusi

Julen Etxeberria -

2021eko urtarrilak 8

Ez da giro Athleticen. Aitor Elizegi buru duen zuzendaritzak klubeko lehen bi talde nagusietako entrenatzaileak kargutik kendu ditu lau eguneko tarte eskasean. Igandean, Gaizka Garitano kendu zuten kargutik, eta atzo, Angel Villacampa. Garitanori egunean bertan topatu zioten ordezkoa: Marcelino Garcia Toral. Entrenatzaile espainiarra bi egun geroago eseri zen lehen aldiz talde zuri-gorriaren aulkian, San Mamesen, Bartzelonaren aurka —1-3 galdu zuen Athleticek—. Villacampak ere badu ordezkoa: Iraia Iturregi taldeko jokalari historikoa izandakoa—bigarrena da emakumezkoen taldean partida gehien jokatu dituztenen artean, 402 neurketarekin—. Iturregi bigarren denboraldiz jarraian ari zen bigarren taldea entrenatzen. Marcelinok bezala, hark ere urte eta erdirako kontratua sinatu du, 2022ko ekainaren 30era arte. Athleticen lehen taldea zuzenduko duen aurreneko emakumezkoa izango da. Gaur eguerdian aurkeztuko dute.

Emaitza txarrek kondenatu dute Villacampa. Bolada ezin txarragoan dago taldea: bederatzi jardunaldi daramatza irabazi gabe, azaroaren 5ean Madrili 2-0 nagusitu zitzaionetik. Inoiz ez da Athletic horrenbeste denbora egon garaipena lortu gabe. Azken bederatzi partidetatik sei galdu ditu, eta hiru berdindu. Jokoan egon diren 27 puntuetatik hiru baino ez ditu eskuratu. Bolada oso txar horren ondorioz, sailkapenean makina bat postu egin ditu behera. Gaur-gaurkoz, 11. postuan da, hamalau jardunalditan hamalau puntu lortuta. Lau puntura besterik ez ditu jaitsiera postuak. Baina bolada txarra ligatik harago doa. Izan ere, joan den urriaren 7an Athleticek aukera ederra galdu zuen aurreko denboraldiko Espainiako Kopako finala jokatzeko, baina penaltietan galdu zuen Logroñoren zelaian, hutsean berdindu eta gero.

BERRIAk elkarrizketa egin zion joan den astean Villacampari, eta, Joseba Agirre kirol zuzendariaren eta Elizegiren babesa zuen galdetuta, esan zuen ez zutela horretaz hitz egin, eta «arreta osoa egoera iraultzeko konponbideak» topatzean zeukatela. Baina herenegun Realaren aurkako derbia galtzeak hura kargutik kentzea ekarri du, eta urte eta erdiko aroa amaitu da.

Villacampak agurreko oharra atera zuen, eta bertan esan zuen «ametsa eta pribilegioa» izan dela «Athletic bezalako klub handi bat» zuzentzea, eta «pena» duela ezin izan duelako ohore hori titulu bat irabazita ordaindu, baina «lehen minututik» eman dutela barruan duten guztia, eta «zaila» izango dela inork leporatzea zerbait haien profesionaltasunaren inguruan. Oso eskertuta azaldu zen ere Agirrerekin, Elizegirekin, haren teknikari taldearekin eta, batez ere, jokalariekin.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Bera Berako jokalariak, duela bi urte Barakaldon irabazi zuten Espainiako Kopako titulua ospatzen. ©MARISOL RAMIREZ / FOKU

Ez da irabazteaz nekatzen

Ainara Arratibel Gascon

Bera Berak zazpigarrenez lor dezake bihar liga, Elxen aurka puntu bat lortuz gero. Taldeak urteak daramatza goian, bulegoetan eta kantxan egindako lan onari esker.

 ©EFE

Quino Colomek ezingo du bihar Baskoniarekin debuta egin

Aitor Manterola Garate

Andorrako joko antolatzailea fitxatu du Gasteizko taldeak denboraldia amaitu arte. Biharko partida, Joventuten aukakoa, atzeratu egin da, positibo gehiago azaldu direlako TD Systems Baskonian.

Bi bikoteak, konforme pilotekin

Inolako kexarik ez pilotekin

Aitor Manterola Garate

Elezkano-Zabaletak eta Peña-Albisuk Binakako Txapelketako igandeko finalerako pilotak hautatu dituzte, Bizkaia pilotalekuan. Peña eta Albisuren bat da ezberdina: bizixeagoa

Mikel Merino eta David Silva, sasoi honetan Valentziaren aurka jokatutako partidan. ©JAVIER ETXEZARRETA / EFE

Armazoia berregin beharrean

Jon Ander De la Hoz

Realean azken asteetan izandako lesioek gabeziak eragin dituzte taldearen jokoan. Mikel Merino eta David Silva jokalariak falta izateak bide batzuk zabalarazi du bestela antolatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.