Itzulerak

Dena itzuli egiten da. Moda munduan ohikoa izaten da duela urte askotako arropa berriro kalean ikustea. Telebistan ere, antzekoa gertatzen da: berritasun gutxi aurkitzen ditugu azken boladan, eta, nostalgiaren aitzakia erabiliz, duela urte batzuetako saioak berriro itzultzen dira.

Aste honetan, Operación Triunfo saioa Amazon Prime Videok emango duela jakin da. Saio horren lehen edizioa 2001ekoa da, eta arrakasta handia izan zuen. Urtzi Urkizuk gogoratu duenez, lehen edizioaren finalak Nafarroan %65,1eko ikusle kuota izan zuen, eta Araban, Bizkaian eta Gipuzkoan, %63,2koa.

Arrakasta horren ostean, zortzi edizio eman zituzten. Zortzigarrenetik bederatzigarrenera sei urteko geldialdia egon zen. Urteak pasatu ahala arrakasta galdu zuen saioak, eta geldialdiaren ostean, 2017. urteko edizioak arrakasta berreskuratu zuen. Edizio hura Amaia Romero Iruñeko abeslariak irabazi zuen. Horren ostean, bi edizio gehiago eman zituzten; azkena, 2020. urtean.

Edizio berriko galak astero ikusgai egongo dira Amazon Prime Videon, eta Youtuben 24 orduko kanal bat egongo da. Oraindik ez dakigu noiz egongo den ikusgai. Saioa orain arte La 1 katean eta Tele5n eman izan dute. Hurrengo edizioa telebista tradizionaletatik aterako da eta streaming plataforma batean egongo da. Aldaketa horrek agerian uzten du plataformak streaming-eko edukiak baino gehiago direla, eta telebista tradizionaleko formatuak bereganatzen dituztela. HBO Max eta Netflixen reality saioak ikusi ditugu jada. Orain, abeslari berriak ezagutzeko lehiaketa famatua Amazon Prime Videok ekoitziko du.

Arrakasta izan zuten formatuak eraldatzen dira telebistan. RTVEk aldaketa batzuk ere ekarri ditu. ETB2ko El Conquis saioa egingo du. Horrez gain, Españoles en el mundo saioaren formatuari buelta eman dio, eta Almudena Ariza kazetariarekin Españoles en conflicto saioa estreinatu zen atzo gauean.

Dena itzuli egiten da. Atzo Ikusgarritasun Lesbikoaren Eguna izan zen, eta Instagramen Dulceida influencer-ak albiste bikaina eman zigun lesbianoi: bere bikotekidearekin itzuli da. Instagrameko bizitza dokumental bihurtu zuen Dulceidak —Prime Videon ikusgai dago—. Plataformak telebista tradizionalaren modetara ere itzuli dira.