gorka julio
IRLEN SAREA

Bat eta beste

2021eko uztailaren 24a
00:00
Entzun
Bat edo beste, maiz erortzen gara pentsamendu dual dikotomiko batean. Gure kulturak, bat eta beste, aukera aniztasuna edo erantzun zuzen bakarrik ez izatea ez du erraz onartzen. Teknologiaren alorra ere kutsatuta dago eta maiz dikotomia faltsutan erortzen gara.

Nolabait definitu beharko bagenu gure garaia, posible dena ukatzetik bizi den mundua dela argudia genezake. Denontzako jateko daukan eta gosez hiltzen duen, etxebizitzak soberan eta kalean bizitzera kondenatzen duen sistema batean bizi gara. Ezagutza eta teknologia libreak izan eta horien aukerak mugatzen dituen sistema baten aurrean gaudela esatea errazegia litzateke, baina horrela da. Janaria eta etxebizitza, behintzat atomoz daude osatuak, ia zero kostuan errepikagarriak diren edukiekin baina zergatik eskasia sortu. Erantzun politiko-filosofiko luze bat eman genezake, baina eskasia artifizialki bada ere sortu behar duen sistema batean bizi bagara, sistema eskas batean bizi gara, alegia.

Maiz ere, gertuko eta urruneko, globalak eta lokalak diren soluzioak antagoniko bezala ikusten ditugu, ez direnean. Berandu gabiltza, adibidez, egunero galtzen ari diren, urteetan sortutako eta balio handiko eduki digital asko babesteko. Gero eta gehiago dira klik egin eta inora ez daramaten URLak. Kolektiboki sortutako talderen batek horri heldu beharko lioke (alor publiko-komunitariotik), baina talde hori sortu ondoren eta datuak hemen ere edukitzeko aukera ziurtatuta, archive.org egitasmoarekin uztartzean egon liteke gakoa.

Berdin gertatzen da datu egituratuekin. gure datuekin gauzak egin ahal izateko, big data delakoa antolatu beharra dago. Berriro ere datu horiek hemen eta ondo antolatuta landuko dituen talderen bat beharko dugu, baina akaso Wikidata bezalako ekimen bati lotuta, ekimen global horri esker datuei balio gehiago emateko.

Berdin gertatzen da EHn erabiltzen diren software libre garrantzitsuekin: Wordpress, Moodle, Nextcloud, Odoo... Gure beharretarako egokitu eta garapen lehentasunak definituko dituen ekimenak behar dira, baina aldi berean software horiek garatzen ari diren komunitateekin harremanetan. Noski sareekin ere berdin eta hortik Guifi.net bezalako sareen garrantzia.

Esango nuke, etorkizunik badugu, unibertsala eta partikularra elkartzetik etorriko dela.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.