Ezkerra

Zer egin zure semea arazoetan sartzen denean eta zure laguntza errefusatzen duenean? Galdera horren erantzunaren bila joateko proposamena egiten digu El hijo zurdo (Movistar Plus) telesailak. Canneseries jaialdian formatu laburreko telesailik onenaren saria jaso zuen duela aste batzuk, eta Rafael Cobosek gidatutako lehen telesaila da. Bertan, Maria Leon aktorea topatu dugu Lolaren rolean.

Lola bi munduren artean dago. Batetik, bere senarra eta bere ama daude. Sevillako boterea lortu nahi du Lolaren senarrak. Alkate izateko aukera du, eta espero du semeak sortutako arazoak bere bizitza politikoan oztopo ez izatea. Lolak senarrarekin duen harremana aspalditik apurtua dago, baina berak senarraren pean jarraitzen du oraindik. Bestetik, seme-alabak daude. Lolak hezitako pertsonak dira, eta ezinbestekoak ditu bere bizitzarekin aurrera egiteko. Beraiekin duen erlazioa oso berezia da, eta menpekotasuna da bi erlazioen oinarria. Bere alabaren babesa beharrezkoa du, baina batzuetan ez du aintzat hartzen. Lorenzo semea gehiago maite duela agerikoa da, eta semea arazoetan sartu dela jakin duenean, bere bizitza alde batera uzten du eta semearen atzetik joaten da. Lorenzo ez du erruduntzat hartzen, eta ez du sinetsi nahi skinhead talde batean sartu dela.

Bitartean, pilulak eta alkohola Lolaren lagun dira. Egoera zaila du. Horren aurrean, ahal duena egiten du. Barrutik apurtutako emakume bat da. Senarraren maitasun falta sufritu ostean, semearen maitasuna beharrezkoa du bizitzeko, baina ez du lortzen.

Amatasunaren alde zail bat agerian uzten digu telesailak. Lolaren inguruak epaitu egingo ditu haren ekintzak, eta telesailaren ikusleek ere epaitu dugu. Lola bizitza galtzen ari da Lorenzo semearengatik, baina, era berean, semearen arazo horiek hauspoa ematen diote bizitzan aurrera egiteko. Egoera horrek idazteko grina piztu dio Lolari: bere semearen istorioa liburu batean jaso du.

Lorenzo eta Lola ezkerrak dira. Ezkerra izateak konnotazio negatiboa izan du beti, eta biak okerreko bidetik joan direla dirudi. Okerreko bide hori botereak ezarritako trabaz beterik dago. Lolak bere senarraren eta amaren boterea saihestu nahi du, eta ezkerreko bidea hartu du. Bizitzaren bidean bere bizitza eta bere semea aukeratu ditu.