BIRA

Neurriak

Onintza Enbeita -

2019ko martxoak 16
Nazio Batuen Erakundearen azken txostenaren arabera, klima aldaketarako hartu izan diren zenbait neurri ez dira nahikoa, eta besteek ez dute ezertarako balio. Ez da zientzialari saiatua izan behar ondorio horretara heltzeko: neurriak hartu dituztela esaten digute erakundeetatik, baina egoerak ez du onera egiten. Beraz, erraz pentsa daiteke zerbaitek huts egiten duela. Dena dela, hor zehar irakurri dudanez, berriz ere elkartuko dira adituak neurri berriak proposatzeko. Ez dakit zeren arabera aukeratzen dituzten adituok, baina pentsatu nahi dut behinolako Rajoyren lehengusuari ez diotela deituko gutxienez. Halakoetan ohikoa denez, hemendik denbora batera jakingo dugu zeintzuk diren klima aldaketa gelditzeko hartuko dituzten eta hartu araziko dizkiguten neurri berri horiek.

Ez dut NBEn, estatuetan eta instituzioetan fede handirik. Eta ez dut haiek ematen dizkiguten neurrien zain egon nahi. Zer egin dezaket nik, ordea? Zer egin dezakegu guk honetan guztian? Beti bezala, dena eta ezer ez. Errua albokoei botatzen jarrai dezakegu, edo eguneroko ekintza txiki guztiak politikoak direla sinets dezakegu behingoz. Berogailua, elikadura, garraioa, hondakinak, kontsumo ereduak... guztiak eragiten du klima aldaketa. Eta geu gara geure ekintzen erantzule.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna