Albistea entzun

BIRA

Mugitzeaz

Onintza Enbeita -

2022ko irailak 15

Bota omen zion arbola gainean lasai zegoen txoriari tiroa eta ez omen zuen jo. Bota ei zion bigarrena eta txoria hasi zen hegan, lasai. «Joño!», esan omen zuen, «hauxe bai txori gogorra!». Ez zekien nonbait eskopetarekin tiro egitea ez dela nahikoa; akabatu nahi dugun horri eman ezean alferrik dela, alegia. Ez dakit zenbat txori ehizatuko zituen, baina pentsatzen dut denborarekin punteria findu egingo zuela.

Horrela egiten da politika hemen: jotzen dute tiro bat eta herriak zer egiten duen ikusteko zain gelditzen dira. Herria geldi geratzen bada, beste tiro bat botatzen dute; ahal dela handiagoa. Eta herriak geldi jarraitzen badu, han entzungo da hirugarren tiroa ere. Azkenean, herria mugitzen hasten bada, eskopeta gorde egiten dute eta gehiegizko erantzuna leporatzen diote jendeari. Ustezko tiro bi jaso eta gero, hegan atera zen txoria bezain gogorra omen herria. Ez baita kontua zenbat tiro aguantatzen ditugun mugitu arte: mugitzea bera baita zalantzan jartzen dena.

Mugimenduan dabilena bizirik dago, ordea, geldi jarraitzen duena ez bezala. Txoriak hegan alde egin ez balu, ehiztaria ez zatekeen ohartuko ez zuela hil, eta berdin gertatzen zaigu gure agintariekin ere: mugitzen ez bagara, gure burutik behera txiza egitea libre dela pentsatuko dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...