IRLEN SAREA

Aurreskundeak

Gorka Julio -

2019ko martxoak 30
Hauteskundeak eta sareak izango dira hurrengo hilabeteetan protagonista nagusiak Hego Euskal Herrian. Komunikazio, propaganda eta kontrol sozial estrategia berriak ikusiko ditugula uste dut; horien sofistikazio maila zenbatekoa izango den izango da zalantza.

Behintzat bi espaziotan lehia izango da, komunikazio irekian mezu ultra segmentatuena eta bot bidezko estrategiak. Komunikazio itxiagoan aldiz meme borrokak eta itzaleko kanpainak. Lehenentzako sare sozialak (Facebook, Twitter, Instagram...) izango dira borroka esparru naturala, eta bigarrengoetan berehalako mezularitza tresnak (Whatsapp, Telegram, Signal...).

Segmentazioari dagokionez, alderdi politikoek legedi berezi baten barnean egokitutako mezu zuzenagoak bideratzeko aukera izango dute. Bestetik, azaleratzen joan dira, bot sareen —benetan pertsonak ez diren perfil automatizatuen— bidez jendearen pertzepzioan eragitea helburu duten estrategiak; horri astroturfing deitzen hasi zaio.

Bestetik, komunikazio itxiagoan, publikoak ez diren kanpaina hedatzeko estrategiak ere garatuko dituzte alderdiek. Memeak, informazio eta desinformazio saiakerak eta bereziki itzaleko kanpainak koordinatzeko erabiliko dira. Itzaleko kanpainen bidez, hainbat pertsonaren esfortzu bateratu bat antola daiteke, une batzuetan eragin gehiago izateko helburuarekin.

Zenbait zerbitzu aldaketa ere egitera doazela dirudi. Facebookek suprematismo zuriaren aldeko mezuak debekatzeko erabakia hartu du. Whatsappek taldeetan egiten diren konbertsazio pribatu gehiegizkoak ez ditu mugatuko, baina erabiltzaile askoren artean bidaltzen diren mezuak markatu egingo ditu, erabiltzaileari mezu hori hedapen intentsibo bat izaten ari dela jakinarazteko. Twitterrek promozio modu berri bat jarri du martxan: mezuek hedapen gehiago izateko aukera zabaldu dute. Ordainduz gero, noski.

Gogoratu 2014ko europar hauteskundeetan Facebookek jarri zuen «bozkatzera noa» botoiaren erabilerak ekarri zuena. 90 milioi pertsonek ikusi zuten mezua; kalkulatzen da 60.000 pertsonek horren ondorioz zuzenki bozkatu zutela, eta 340.000 gehiagorengan eragin zuela. Abstentzioari aurre egitea garrantzitsua bihurtuko den hauteskundeak izaki, kontuan hartzekoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna