Biobotak

Ameriketako Estatu Batuetako lau zientzialarik sortu dituzte lehen «makina bizidunak». Animalia zelulekin eginak dira, eta oso zeregin errazak aurrera eramateko gai badira ere, lehen biobotak hemen dira.

Ikertzaileek, AEBetako Defentsa Departamentuak finantzatuta, DARPA —Interneteko hastapenak izan ziren DARPANET finantzatu zuten berak—, eraman duten aurrera ikerketa. Aplikazio praktikotatik oso urrun egon badaitezke ere, etorkizunean aplikazio medikoetarako —tumoreen detekziorako, arterien plaka kentzeko eta giza gorputzaren barruan sendagaiak modu adimentsuan banatzeko— erabili ahal izango direla uste dute.

Afrikako igel baten bi zelula mota erabili dituzte adreilu gisa ikertzaileek: haren bihotzeko zelulak —uzkurkor— eta haien azalekoak —pasiboagoak—. Hainbat hilabetetan, zientzialariek superordenagailu bat erabili dute milaka agregatu zelular simulatzeko, eta haien portaera iragartzen saiatzeko. Emaitza milimetro erdiko makina biologiko bat da, ehunka zelula gutxi batzuekin, zientzialariek norabide jakin batean mugitzeko gai dena.

Aurkikuntzak edo sorkuntzak —nola deitu ahal zaion ere zalantzagarria da— erronka berriak jartzen ditu mahai gainean. Bi biologo eta beste bi robotika aditu behar izan dira ikerketa burutzeko. Emaitza milaka proba birtualen osteko emaitza onena eman duten esperimentu birtualen ondorioa da. Sortu direnak, aldiz, ez dira robotak, eta ez dira, hertsiki, organismoak. Biologoez eta ingeniariez gain, filosofoak lanean jarri beharko ditugula dirudi, bizitzaren eta makinen arteko harremana birpentsatzen hasteko. Medikuntzako adituak edo auskalo zein aditu, arituen faltan, ere beharko ditugu aurrean dauzkagun bioteknologiaren garapen horietan pentsatzeko.

Gizakiak ez du natura eraldatzen, bera eraldatzen da gizakiok sortzen ditugun aldaketetara. Nekazari batek lurra lantzen duen moduan, gauza bat edo bestea posible egiteko moldatzen du lurra, baina gero naturak berak erantzuten dio horri: barazki oparoak ematen edo hurrengo euri jasan lur horietan luizi bat eraginez. Gizakiok asmakizunekin zer egin erabaki dezakegu, tresnekin edo lanabesekin bezala, golde batekin bezala; horiek erabiltzean, naturak nola erantzungo duen ikusteko dago, baina lurra lantzen jarraitu behar da.