Inkoherentziak

Modek pertsonen ohiturak aldatzen dituzte. Janari prestatuan dauden gehigarriek arduratzen gaituzte, baina janari freskoa kozinatzeko denborarik ez dugu hartzen. Horrelako inkoherentziak egunero izaten ditugu, eta horietaz barre egiteko aukera dugu Putos Modernos (Filmin) telesailean. 2-3 minutuko lau kapituluko telesaila da. Bizitza azkarrerako ikus-entzunezko pilula apartak.

Lau kapituluetan egoera desberdinak ikusten ditugu, eta guztietan protagonisten inkoherentziak agerian geratzen dira. Batek ura aukeratu baino, kombucha edaria nahiago du, naturalagoa dela uste duelako. Beste batek bere opor egunak kirola egin eta ondo jateko aprobetxatu nahi ditu. Kirol hori etxean duen bizikletan egingo du, eta bazkaltzeko aplikazio baten bitartez eskatuko du janaria. Etxean egindako kirolaren ostean, ezin da etxetik atera bere janaria izateko. Ondoren, bikote bat ikusiko dugu: jatetxe berezi batean egongo dira bazkaltzen eta goi sukaldaritzan gertatzen diren esperientzia arraroen hiperbolea ikusiko dugu. Azkenik, gizarte modernoaren arazo ohikoena agertuko zaigu: deskonektatzeko asteburu baten beharra oihukatu ostean, Interneteko konexioaren beharra ezinbestekoa egiten zaigu.

Fikzioaren atzean telesailaren izen bereko komunikazio agentzia dago. Bere sare sozialetan inkoherentziaz beteriko egoeren inguruan barre egiten dute, eta umore hori ikus-entzunezko honen bitartez plazaratu izan nahi dute.

Aurreko astean, moda berri baten inguruan hitz egin zuten EITBko albistegietan: Tiktoken musika entzuteko speed up bertsioak. Musika azkarrago entzutea modan jarri da, eta Tiktoken bideo horiek arrakasta handia dute. Horrek musika azkarrago egiteko joera sortu du. Moda hori telesailak ikusteko moduan agertu zen, eta orain musikara iritsi da. Funtsean, bizitza azkarrago bideratzen ari gara, eta aisialdia ondo aprobetxatzeko dena azkar kontsumitzeko bidera goaz. Moda berri horren erreportajearen amaieran, Juan Carlos Etxeberria aurkezleak disko-jogailuarekin musika modu azkarrean entzuteko aukera zegoela gogorarazi zuen. Moda berriak badira ere, zaharretik asko dute. Oso modernoak garela pentsatzen dugu askotan, baina inkoherentziaz beteriko moda horietan erortzeko arrisku etengabean bizi gara.