Algoritmoak legeak dira

Rider legea martxan jarriko da eta Glovo eta Deliveroo bezalako enpresek, orain arte autonomoak ziren riderrak soldatapeko langile bihurtu beharko dituzte. Hiru hilabete, baina, asko da egoera legeztatzeko eta bitartean langileak erasotzeko aukera dauka enpresak.

Glovon, azken asteetan, algoritmoak modu desberdinean funtzionatzen du. Banatzaile izandako batzuek diruaren erdia fakturatzera pasatu dira, kalean ordu berdinak pasata ere. Justiziak soldatapeko langile jo zituen riderrak, eta Gizarte Segurantzak alta eman zien ofizioz. Enpresan urteak pasatu dituzten langileen kaleratzeagatik kalte ordaina oso handia izango litzatekeenez, «bordondatezko kaleratzeak» izatea lortu nahi du Glovok.

Kaleratzeak sustatzeko erabiltzen duten beste estrategiatako bat langile-kopuruaren gehiegizko neurria da. Ordu-tarte batean lanean 20 langile baziren orduko bi eskaera egiten, orain, Glovok 40 jartzen ditu, langile bakoitzak eskaera bakarra egin dezan. Horrek fakturazioan eragiteaz gain, Ken Loachen Sorry we missed you filmean ederki irudikatzen den barne-konpetentzia eta presioa areagotzen du. Plataforma kapitalismoaren garaian gaudela azaldu duu Nick Srnicekek. Zerga-ihesean oinarritutako eredu batean murgilduta. Hoteletan, erredakzioetan, lantegietan edo taxietan inbertitu beharrean, zerbitzariak jartzearekin amesten eta aberastu nahi dutenen esku dagoen modelo batean. Plataformakoak ez diren enpresak, negozioarekin jarraitzeko, plataformak erabiltzera behartuta dauden eredu batean.

Lege hori posible izan bada, eredu hauei aurre egiteko antolatu diren mugimenduen ondorioz izan da. Batzuk erresistentziatik, ohiko sindikatuen lan ildo bilakatu dira —LAB, adibidez—; sindikatu sozial forma hartu dutenak ere izan dira, Ridersxderechos kasu; beste batzuk, enpresa horietan zeuden langileek antolatutako kooperatiben forma hartu dute, plataforma-kooperatibismoaren ereduan jaiotako Eraman kooperatiba adibidez. Praktika horiek eta beste batzuk biltzen ditu Cuando tu jefe es una app liburuak.

Legea interesgarria da, baina plataforma horietako algoritmoak kode lerro gehiago dituzten legeak dira soilik. Ez da nahikoa zer egiten duten jakitea, horiek kontrolatzeko gaitasunik eskuratzen ez badugu.