Kulturarteko punk eztanda feminista

Pistol, The Eddy, The Dirt, Metal Lords... azken urteetan ugaritu egin dira errealitatea inspirazio iturri duten musika taldeen inguruko fikzioak. Emakumeen ahotsak erdigunean jartzeko ahalegina, ordea, faltan sumatu izan da horietako gehienetan. Orain, Erresuma Batuko Channel 4 telebista kate publikoan estreinatu zenetik bi urtera, We Are Lady Parts telesaila Hego Euskal Herrira heldu da, Filmin plataformaren eskutik. Londresen punk talde bat osatzen duten bost emakume gazte musulmanen inguruko istorioa da.

Telesailak hiru Bafta sari irabazi ditu, eta Erresuma Batuko kritikarien ahobatezko gorespena jaso du. Narrazio estiloa zuzena da, eta muntaketa, bizia, erraz jarraitzen diren horietakoa. Baina estalkiaren azpian entretenimendu soila baino askoz gehiago dago. Neskato protagonista tradizio musulmanean kateatuta dabil, amodio erromantikoari eta ezkontzeko desirari uko egin ezinik. Gitarra irakaslea den arren, agertokira igotzearen beldur da, eta bere bizitza hankaz gora jarriko dute musika talde bat osatu nahi duten lau neska grinatsuk.

Punk musikaren desafiorako espiritua euren egunerokoan praktikara eramanez, Lady Parts bandako kideek «Voldemort nire belopean», «Bashir bizar on batekin» eta «Inperioak hautsia, MTVk aupatua» tankerakoak oihukatzen dituzte mikrofonoan, mundu moderno eta nahasi honetan benetan aske izateko euren lurralde bakarra musika balitz bezala.

Musika eta ahalduntzea

Entsegu lokaletik audizio gelara bidean, autoan entzuten eta kantatzen dituzte euren artista kuttunen ereserkiak; tartean, Blink 182, System of a Down, Slipknot eta Chavela Vargas. Baita folk pakistandarreko Sanam Marvi izarraren doinuak ere. Musikak goitik behera zeharkatzen du telesaila, eta hori ez da kasualitatea; izan ere, istorioa Singapurren jaiotako Nida Manzoor sortzailearen bizitzan inspiratuta dago, eta hura da soinu bandaren konpositorea. 8 urteko haurra zenetik jo izan du gitarra, eta musika izan zen haren lehen pasioa, zinema munduan barneratu aurretik. Giro horretan uler litezke dagoeneko pop kulturako artefaktu diren La La Land filmari eta The Handmaid's Tale telesailari eginiko keinuak.

Emakumeen ahalduntzea telesailaren ardatzetako bat da, baina baita botere joko labainkorra ere. Taldea punk lotsagabea egitetik sare sozialetako fenomeno izatera igaroko da, eta sortzaileak iraultzaz, arrakastaz eta gizarte onarpenaz gogoeta egiteko baliatuko du.

Telesailak espiritu aske, jostari eta umoretsua du, baita iraupen laburra ere: sei ataletako bakar bat ere ez da ordu erdira iristen. Horregatik, nerabeekin eta euren ahotsa bilatzen ari diren gazteekin konektatuko du batez ere, eta, oro har, sistema honetan ezberdin sentitzen den edonorekin, izan musika, politika, genero identitatea edota erlijio sinesmenen bitartez.

We Are Lady Parts-en amaiera atsegina eta biguna da, aurreikus litezkeen horietakoa, baina gehiago eman dezake, eta horren seinale da dagoeneko baieztatuta daukan bigarren denboraldia. Bozgorailuek patriarkatuaren atzaparretatik urrun egingo dute orro, beste behin ere.

'WE ARE LADY PARTS'
Sortzailea: Nida Manzoor.
Aktoreak: Anjana Vasan, Sarah Kameela Impey, Faith Omole, Lucie Shorthouse, Juliette Motamed.
Herrialdea: Erresuma Batua.
Urtea: 2021.
Non ikusi: Filmin.
Atal bakoitzaren iraupena: 25 minutu.
Generoa: komedia eta drama.