Albistea entzun

Telesailak

Utopia demokratikoaren arrakala

Islandiako 'Radherrann' telesailak fikzio politikoa irauli du, kode moralei buruz hausnartzen duten zortzi ataletan
BERRIA Tamaina handiagoan ikusi

Mikel Yarza Artola -

2021eko martxoak 13

«%90eko parte hartzea zenbatu ezean, ez dut gobernurik osatuko». Benedikten hauteskunde kanpainako hitzak dira, Islandiako lehen ministro izateko hautagai nagusia da fikziozko Radherrann telesailean. Istorioko protagonistak aparteko nortasuna du, eta ohiko konbentzioetatik oso urrun dago haren filosofia politikoa.

Parte hartzearen helburua ozta-ozta lortuta, apustua handituko du. Twitter bidez, lege proposamenak egin eta gobernu koalizioko hitzarmena idazteko aukera zabalduko die biztanle islandiar guztiei. Prozedura instituzionaletan aldaketa erradikal bat eragiten duten neurrien aldekoa da Benedikt, politikari gardena eta pertsona abegikorra. Denek maite dute, baina ez une oro.

Izan ere, aldarrikatzen duen idealismoa irrigarri bilakatzen da batzuetan, bere inguruko pertsonen pazientzia amaitzeraino. Esaterako, txorien bizileku historikoa den landa eremu batean, hotel bat eraikitzeko urte luzez landuriko planez jabetzean erabakiko du Gobernuaren eta enpresarien arteko itun bat ez sinatzea. Bi migratzaile ukrainar Islandiatik kanporatu behar dituztela ohartzean, berriz, legea aldatuko du egun batetik bestera, haien herritartasuna bermatzeko. Erabakiak berehala hartu ohi ditu telesaileko protagonistak, bidean alderdia hankaz gora jartzeko eta gobernukideak amorratzeko beldurrik gabe.

Hedabideekin harreman ezin hobea du Benedikt lehen ministroak, eta galeriarentzat beti dirudi pertsona perfektua. Baina, barrura begiratuz gero, ikusleak ohartuko dira pitzaduraz beteta dagoela. Pixkanaka, utopia demokratikoa arrakalatzen hasiko da, eta Benedikten mamu pertsonalek geroz eta pisu handiagoa hartuko dute kontakizunean.

Europa iparraldeko fikzio politikoari erreparatuz gero, Borgen danimarkarra da erreferentzia nagusia, eta Radherrann telesailak badu harekin antzekotasunik. Lehen atalak tematikoak dira, eta erakusten dute Benedikt lehen ministroak nola bideratzen dituen gobernu jardunari loturiko krisiak. Bigarren zatian, ordea, sortzaileek 180 graduko bira egin dute, eta psikologiaren ur sakonetan murgildu dira, ausardia formal handiagoko lan bat osatzeko.

Telebistaren munduan ia esperientziarik ez duten bi abokatuk eta kazetari batek sortu dute telesaila, eta, horri esker, fideltasun handiz eraman dituzte iruditara lotura estua duten errealitateko hiru unibertso: zuzenbidea, politika eta hedabideak.

Islandia Danimarkaren kolonia izan zen 1944ra arte, eta bertan dago munduan zutik dirauen parlamenturik zaharrena. 930. urtean eraiki zuten Althing izeneko eraikina, ostera herrialdeko hiriburu bilakatu zen Reykjaviketik 45 kilometro ekialdera. Orainaldira etorrita, 2008ko krisi ekonomikoan erantzule politiko nagusiak epaitu eta kondenatu zituen herrialde bakarra izan zen Islandia. Bistan da bestelakoa dela haien kultura politikoa.

Osagai horiek guztiak irabiatuta, koktel gozagarri bat da emaitza. Radherrann telesaila interesgarri izango da fikzio politikoaren zaleentzat, baina baita, oro har, gizarteko balioez eta afera filosofikoez hausnartzea gogoko dutenentzat ere.

'RADHERRANN'
Sortzaileak: Arnor Palmi Arnarson, Nanna Kristin Magnusdottir.
Aktoreak: Olafur Darri Olafsson, Anita Briem, Logi Hrafn Jonsson, Thor Kristjansson, Elva Osk Olafsdottir.
Herrialdea: Islandia.
Urtea: 2020.
Non ikusi: AMC.
Atal bakoitzaren iraupena: 50 minutu.
Generoa: Drama.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Maddalen Arzallusek eta Xabier Sukiak aurkeztuko dute 2022ko lehen saioa ETB1en: <em>Biba 2022!</em>. ©EITB

ETBren kanpaiak, Gasteiztik

Urtzi Urkizu

ETB1en Ainhoa Etxebarriak, Aitziber Garmendiak eta Yerai Diezek aurkeztuko dituzte kanpaiak

 ©GORKA RUBIO / FOKU

«Ekialdean berariaz zaindu dute xakea»

Gorka Erostarbe Leunda

Jolasa eta jokoa. Lehia eta estrategia, baina baita zientzia, artea, poesia eta bizitza ere. Guztiak islatzen ditu xakeak. Alderdi horiek bildu ditu Berasaluzek '64 begirada. Xake taularen zuri-beltzean' lanean.
Daliren maskara biral egin da. ©NETFLIX

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.