Atea zabalik dute berriek

Batzuk joan, eta besteak etorri. Horixe izaten da bizilegea, eta pilota arloan ere bada halakorik aspaldian. Besteak beste, Iker Irribarriak atzo jokatu zuen profesional mailako azken partida, baina, gazteek ere atea zabalik izan dezaten, ezinbestekoa da afizionatu mailako txapelketek aurrera jarraitzea. Bada, aurten ere martxan da Berria Txapelketa, eta hemezortzigarren ekitaldia izango du. Ordea, pilotarien artean ez ezik, antolakuntzan ere izango da aurpegi berrien beharra. «Duela bi hamarkada hasi ginen lehiaketa hau antolatzen, eta ibilbide oparoa izan du. Lortu dugu gazte mailako pilotarien artean tokia egitea eta pilotazaleen errespetua izatea. Elkarteen lanari balioa ematen dion txapelketa bakarra da hau, eta atea zabalik izango du sistema honekin jarraitu nahi duen edonork», adierazi zuen Rufino Rekaldek. Erretiroa hartuko du hark, eta elkarteei deialdia zabaldu zien.

Txapelketaren aurkezpen ekitaldia atzo egin zuten, Astigarragako Petritegi sagardotegian (Gipuzkoa), eta bertan bildu ziren elkarteetako ordezkari eta babesleak. Bigarren urtez, BERRIA egunkariarekin batera, babesle izango dira Petritegi sagardotegia eta Adarra Lan Tresnak enpresa. «Zinez eskertuta gaude babesleekin gure ondoan egoteagatik. Aste honetan bertan erremonte txapelketa aurkeztu dugu, eta eskuzko modalitatean ere aurrera jarraitzea ohorea da guretzat», adierazi zuen Martxelo Otamendik, BERRIAko zuzendariak. Inoizko talde gehien lehiatuko dira aurten, 29: Euskal Herriko 26k, Errioxako bik eta Bartzelonako elkarte batek parte hartuko dute. Datorren asteburuan abiatuko da, Zazpi Iturri eta Lagun Artearen arteko atarikoarekin, eta ekainaren 25ean izango dira finalak, Hernanin (Gipuzkoa), San Joan jaien barruan.

Ohi bezala, kadete, gazte eta nagusien mailetan jokatuko dira partidak, eta bi neurketa irabazten dituen elkarteak egingo du aurrera. Hots, lehen bi partidak elkarte berak irabazten baditu, tanto sistemak aginduko du. Berritasun gisa, aurten bigarren urteko haurrek parte hartzeko eskubidea izango dute. Bost aurre-kanporaketa jokatuko dira, eta ondoren final-zortzirenak izango dira; gero, final-laurdenak, finalerdia eta final handia. Elkarte irabazleak 3.000 euroko saria jasoko du, eta txapeldunordeak, 2.000koa. Hirugarren klubak 1.000 euro jasoko ditu, eta laugarrenak, 500». Faboritoen zerrendan Lazkaoko LAPKEren izena ageri da guztien gainetik. Iazko txapeldunak dira goierritarrak, eta aurten ere oso talde indartsua daukate.

Emakumeei dagokienez, aurten ere jokatuko da txapelketa, hirugarren urtez segidan, baina aurrerago emango dute zehaztapen guztien berri, prentsaurreko batean. Estreinako aldiz, izen emate irekia egin dute, eta oraindik telefonoa joka dute antolatzaileek. Bide onean doa parte hartzaileen kopurua.