Sua

Hau irakurtzeko Kokoshca taldearen Himno de España abestia jartzea gomendatzen dut).

Madrilgo eraikin batek su hartu du. 2005. urtean gaude, eta Azca eremuan erre usaina dago. Windsor eraikina sugarrek hartu dute eta inork ez daki nola hasi den su festa. Garren ondoren errautsak geratu dira eta hormigoia agerian da. Eraikin horretan enpresa askoren sekretuak gordetzen ziren, eta bat-batean sekretuak zaborraren artean ezkutatu ziren.

Mito eta uste asko sortu dira sute horren inguruan. Eraikinean mamuak egon zirela, suhiltzaileek ur presio baxua izan zutela sutea itzaltzeko, eta sutearen atzean Villarejo komisarioa egon zela esan izan da azken urteetan. Hilaren 12an, sutea piztu zenetik hemezortzi urte bete ziren. Horregatik, HBO Maxek La Maldición del Windsor dokumentala estreinatu zuen egun berean.

Dokumentala estreinatu behar zela jakin nuenean, El Intermedio saioko kolaboratzaile Erik Harley etorri zitzaidan burura. Arkitekturaren inguruan hitz egiten du saio horretan. Horrez gain, eraikuntzen inguruko ibilbideak egiten ditu hiri desberdinetan. Madrilgo ibilbidean Azca inguruko azalpen asko ematen ditu eta Windsor eraikinaren inguruan hitz egiten du. Horrez gain, otsailaren 12an, sutearen efemeridea kontuan hartuz, eraikinaren inguruko bideo bat zabaldu zuen bere Instagrameko kontuan.

Eraikin bat sutan ikustea ez da oso ohikoa. Horregatik, sute hori zerk eragin zuen jakiteko ikerketa zehatz bat egingo zela pentsatu zuten sutea ikusi eta bizi izan zuten guztiek. La Maldición del Windsor dokumentalean ikerketaren inguruan hitz egiten da. Ikerketa azaletik egin zela aipatzen da. Horrek sutearen mitoak eta gezurrak hedatzea ekarri zuen. Dokumentalean zehar, mito horien zergatiak azaltzen dira.

Windsor dorrearen jabeak Reizabal familiakoak ziren. Familiako burua Julian Reizabal izan zen —dorrea amaitu baino lehenago hil zen—. Negozio guztiak bere seme-alaben artean banatu zituen hil baino lehenago. Familia horren istorioak Succession telesaila gogorarazi dit. Batzuetan, errealitateak fikzioa gainditu egiten du. Windsor eraikinaren suteak eta familia horren tirabirak sobran gainditzen dute fikzioa, eta dokumentala ikusi bitartean, zaila egiten da gertatukoa egia izan zela pentsatzea.