Bizkaia: mobilizazioak izan dira indargunea

Grebak oihartzun gorabeheratsua izan du Bizkaian. Goizean goiz, trafikoan eragin nabarmena izan dute, esaterako, Bilborako hiru sarbide nagusietan piketeek egindako trabatzeek, eta hainbat kilometroko auto ilarak sortu dituzte Zamudioko Parke Teknologikoan egindako etenek ere. Lea-Artibai inguruko industria guneetan itxita egon dira Cikautxo, Eika eta Nemec, adibidez. Baina, salbuespenak salbuespen, orokorrean irekita egon dira saltoki, lantoki eta merkataritza gune gehienak, eta hiriburuan egindako eguerdiko eta arratsaldeko mobilizazioetakoa izan da eguneko indar erakustaldi nagusia. Sindikatuek zehaztu dutenez, Bilbon greba egin zezaketen hamar udal langiletik zazpik egin dute greba, eta erantzun zabala izan du Durangaldeko, Busturialdeko eta Arratiako udaletan. FVEM patronalaren arabera, Bizkaiko metalgintzan grebak %12ko erantzuna izan du. Bizkaiko campusetan, berriz, %10 izan da jarduera.

Zehazki, Juan de Garaiko, Errekaldeko eta Sabino Aranako sarbideak itxi dituzte grebalariek Bilbon, eta metroak eta autobusek gutxieneko zerbitzuak eman dituzte. Horrek ohi baino itxura motelagoa eman dio hiriari, baina irekita egon dira kale komertzial nagusietako saltoki gehienak. Erriberako merkatua itxita egon da. eta Zabalgunekoa, erdiz bakarrik.

Lea-Artibai eskualdea eta inguruak izan dira beste foku bat. Gizaburuagako Okamiko industrialdean itxita egon dira enpresa guztiak hiru salbu, eta Berriatuan, besteak beste, zarratuta egon dira Cikautxo (seiehun langile) eta Nemec (mila). Eika kooperatibak ere ez du aterik ireki.

Ondarroan, portuan mugimendu gutxiago igarri da, eta itxita egon dira zenbait super merkatu handi ere.

Barakaldon, oso jendetsuak izan dira grebalari zutabeak, eta bi ordu inguruz errepidea ixten jardun dira BEC erakustazoka aurreko biribilgunean eserita. Gernikan, herrian igarri da greba, eta goizez itxita egon dira taberna eta saltoki asko. Mungian, Bermeon eta beste zenbait herritan, ordea, itxiera jakin batzuk salbu, ez da izan arrakasta handirik.

Sindikatuek salatu dute gutxieneko zerbitzuak gehiegizkoak izan direla, eta horrek mantendu dituela zabalik hainbat zahar etxe.