Sanferminez

Dagoeneko bi egun joan dira Iruñeko Udaletxe plazan txupinazorik bota ez zenetik. Aurten ohiko ospakizuna ordezkatu dute lagunek Whatsapp bidez bidalitako mezu triste bezain itxaropentsuek (ez gutxi oporlekuetatik igorriak). Aldi berean iskanbilatsu egon beharreko bazterrak zeinen hutsik eta maxkal dauden erakusten duten argazkiak nonahi.

Normaltasuna saldu nahi dute, zuhurtzia, euskal jaietako lehena edo lehenetarikoa den hau eredurako balioko balu. Baina antzezpen hutsa da. Urtebete du ez-jaien kontzeptuak eta ongi asmatua da. Ez da gauza bera bestarik ez egotea edo ez-bestak egotea. Iruñean ibiltzea aski da ohartzeko. Beste hirietan ere sarri. Antzezpen hutsa da. Ustezko normaltasunari lagunduko lioke zerbitzu publikoak irekita baleude. Gaur, uztailaren zortzian, zergatik ezin naiz San Frantzisko plazako liburutegira joan (ez gaur, ez bihar, ez uztailaren 15era arteko edozein egunetan)? Zergatik ezin naiz datorren astera arte ospitaleko farmaziara joan bertan jaso ohi ditudan sendagaien bila? Zergatik dira tabernak itxita aurkituko ez ditudala ziur dakidan toki bakarrak? Halere, kontuz ibiltzeko eta arduratsu izateko erretolika nonahi.

Lagunek kexati hutsa naizela esaten didate (ez gutxik oporlekuetatik).